I-DA ifuna uphenyo ngeziguli ezineMDR
I-DA seyibhalele ihhovisi likamvikeli wezempilo kuzwelonke ithi akuphenywe ngeziguli ezingu-123 ezinofuba olungayizweli imishanguzo okuthiwa azisezwa ezindlebeni ngenxa yokushoda kwezinsiza kusebenza esibhedlela saseNdwedwe, iMontebello.
Lokhu kulandela ukuma kokusebenza komshini osetshenziselwa ukuhlola izindlebe zeziguli ngoba kuntshontshwe i-laptop ene-software yokufunda imiphumela yeziguli.
UDkt Imran Keeka, okhulumela iDA kwezempilo e-KZN, uthi sebebhalele ihhovisi likamvikeli wezempilo kuzwelonke i-Office of Health Standards Compliance (OHSC) eliholwa nguSolwazi Malegapuru Makgoba becela liphenye ngalezi zinsolo. Bafuna liphenye ngokukhubazeka kweziguli ezingu-123 ezinofuba olungayizweli imishanguzo, i-multi drug resistant TB (MDR TB) zasesifundeni iLembe okuthiwa bezingahlolwa ngokufanele ukuthi zisengozini engakanani yokugcina zingezwa ngenxa yemishanguzo. Kulezi ziguli, ziyisishiyagalolunye kuphela ezifakelwe izinsiza kuzwa. Phezu kwalokhu kuthiwa kulezi ziguli sekushone eziyisithupha.
Lezi zinsolo ziqukethwe umbiko oyimfihlo woMnyango wezeMpilo KwaZulu-Natal osubonwe yileli phephandaba ngokunakekelwa kwalezi ziguli, eMontebello.
“Sithole ukuthi umshini osetshenziselwa ukuhlola amazinga obungozi bemishanguzo ezindlebeni bewungasebenzi kusuka ngoNovemba 2015.
“Kuthiwa yingoba kwantshontshwa i-laptop ebinesoftware esetshenziselwa lolu hlelo. Isibhedlela asikwazanga ukuthola usizo kwezinye izibhedlela.
“Lokhu kwenza ukuthi ukuhlolwa kweziguli kumiswe kuze kube nguMashi 2016,” uchaze kanje.
Ngokusho kwakhe udokotela owelapha izinkinga zezindlebe nokunguye yedwa ugcine esesebenzisa i-laptop eyodwa nolunye uphiko kodwa lokhu akusizanga ngoba iziguli bezingahlolwa nsukuzonke.
“Isimo saseMontobello asamukelekile neze. Akwamukelekile ukuthi abantu bagcina bezithole sebekhubazekile ngenxa yento ebingagwemeka,” kusho uDkt Keeka. Uthe okwenzeka kulesi sibhedlela ukholwa ukuthi kuyenzeka nakwezinye.
Uphinde wathi kuveza ubudedengu bomnyango oholwa nguNgqongqoshe wezeMpilo uDkt Sibongiseni Dhlomo, athe ubengazi ngalesi simo anduba iDA ilwethule ezindlini zesishayamthetho ngeledlule.
Kuthiwa lolu daba seluke lwabhungwa abezempilo esifundeni saseLembe kusuka phakathi kuka-2015 no-2017.
Okhulumela uMnyango wezeMpilo, uMnuz Desmond Motha akazange acacise ngezinsolo ezibekwa ngokungahlolwa kweziguli okuthiwa kuholele ekutheni zigcine zingasezwa.
Uchaze ngengozi ebekwa yimishanguzo ezigulini ekutheni zigcine zingasezwa ezindlebeni nangemizamo abayenzayo ukuqinisekisa ukuthi abanofuba basheshe bathole imishanguzo.
Bethintwa abe-OHSC bathe bacela izintatheli zithinte uDkt Keeka ukuthola ngesicelo esifakiwe.