Kutholwe umfundi ebulewe eClermont
BASHAQEKILE abafundi baseZiphathele Secondary, eClermont emuva kokutholwa kwesidumbu somfundi walesi sikole esikhotheni esibuqamamana nesikole.
Isidumbu salo mfundi (17) obefunda u-grade 12, sitholwe ngamalungu omphakathi kanti kuthiwa besisele ngephenti kwesingezansi.
Ngesikhathi ithimba leSolezwe lifika eZiphathele ngabo-12 emini, abafundi bese bededeliwe ukuthi bagoduke njengoba abaningi bebekhala ngokuthi bathukile.
UMnuz Sfundo Ndlovu ofundisa abafundi baseZiphathele i-maths utshele ukuthi ubizwe ngabanye abafundi ngabo-5.30 ntambama ngoMsombuluko bemtshela ukuthi kunesidumbu somfundi esikhotheni.
“Ngithe uma ngifika ngabona umfundi ngase ngimboza ngesikhafu ngoba isingezansi besisele ngephenti obekubukeka sengathi belidatshulwa.
“Kungiphethe kabi ngoba nasemathangeni ubeseluhlaza, ngisola ukuthi udlwenguliwe ngaphambi kokuthi abulawe,” kusho uNdlovu.
Uthe bafonele amaphoyisa aKwaDabeka, athatha ihora nohhafu ukuthi afike ukuzolanda isidumbu ngenxa yokuthi amaveni abengekho.
“Umfundi ubenza i-maths ne-physical science ezimisele ngokufunda okwenzeka emkhathini ngoba ubethanda izinto eziphathelene nezinkanyezi,” kusho uNdlovu.
UBuyanda Gama okhulumela iCongress of South African Students (Cosas) KwaZulu-Natal uthe baphatheke kabi ngokubulawa kwabafundi nokudlanga kodlame olubhekiswe ezinganeni nakwabesifazane.
“Sicela uNgqongqoshe wezokuThutha nokuPhepha koMphakathi KwaZulu-Natal andise isibalo samaphoyisa asebenza emalokishini ngoba bandile ubugebengu.
“Siphatheke kabi ngoba umfundi oshonile ubengunobhala weCosas lapha eZiphathele.
“Siyacela amaphoyisa aphenye kabanzi ngoba kusolakala ukuthi wagcina ukubonakala ekhaya ngoMgqibelo eya ephathini akazange abuye njengoba etholwe eseshonile,” kusho uGama.
Uthe uma ungqongqoshe engasandisi isibalo samaphoyisa bazomasha noma benze ezinye izindlela zokuthi andiswe ngoba kuyacaca ukuthi abantu abaphephile.
Imizamo yokuthola abazali bomfundi oshonile ayiphumelelanga njengoba ucingo lukanina belukhala lungabanjwa kanti olukaninalume belungena kwi-voicemail. UColonel Thembeka Mbhele wamaphoyyisa KwaZuluNatal, ukuqinisekisile ukuthi ngoMsombuluko kutholwe isidumbu sowesifazane esikhotheni esikuKings Road, eClermont. Uthe isidumbu besinezibazi esiswini nasemathangeni kanti okwamanje ayaziwa imbangela yokubulawa kwakhe njengoba kusahlolwa isidumbu namaphoyisa eqhubeka nophenyo.
UMnuz Kwazi Mthethwa woMnyango wzeMfundo KwaZulu-Natal uzwelane nomndeni womfundi oshonile wathi akazi kungani izigameko ezimbi zehlela izingane eziyikusasa lezwe.
Ugqugquzele amaphoyisa ukuthi aphenye ngalesi sigameko ukuze kujeziswe izigilamkhuba.