Kushone amalungu amahlanu omndeni kushayisana izimoto
KUSHONE amalungu amahlanu omndeni ngesikhathi imoto abebehamba ngayo i-Toyota Avanza ishayisana nenye ne-Land Rover 4x4 emgwaqweni u-R616 eBergville ngoMsombuluko ebusuku.
Amalungu omndeni anebhizinisi abengakadalulwa amagama awo kuthiwa abephuma eBergville eya ngaseMnambithi ngesikhathi evelelwa yingozi. Abashonile baneminyaka ephakathi kwengu-30 no-70.
Okhulumela amaphoyisa KwaZulu-Natal uColonel Thembeka Mbhele uthe amaphoyisa aseBergville aphenya amacala okubulala ngokungenhloso.
Okhulumela abezimo eziphuthumayo bakwa-ER24 uMnuz Russel Meiring uthe akukho abebengakwenza, befike laba abahlanu sebeshonile. “Sifice abantu besilisa abathathu nababili besifazane sebeshonile bengaphandle kwemoto. Kwenye imoto bekukhona abantu abathathu. Sibalaphile sabe sesibaphuthumisa esibhedlela saseMnambithi, ” kusho uNksz Meiring.
Khonamanjalo izolo kushone umfundi oyedwa kwalimala abanye ngesikhathi ibhasi ebelithwele abafundi abangu-48 ligingqika ku-N3 phakathi kwe-Hilton naseMgungundlovu.
Ngesikhathi kufika abakwa-ER24 bathe abafundi bebezama ukuphuma ngamawindi kuleli bhasi, abanye bese bevele bezulazula ngaphandle kwebhasi.
Kuvalwe umgwaqo ngesikhathi kusahlolwa laba bafundi. Ababili abafundi bebelimele kakhulu abanye benemihuzuko engatheni.
Bonke abafundi baphuthunyiswe ezibhedlela ukuze bathole ukwelashwa okufanele. Amaphoyisa ayaphenya ngembangela yengozi.