I-ANCWL eKZN ixwayisa uMotshekga
I-ANC Women’s League (ANCWL) KwaZulu-Natal isixwayise ungqongqoshe wezeMfundo eyiSisekelo kuzwelonke, uNkk Angie Motshekga, ukuthi ayeke ukusebenzisa igama lenhlangano ukukhankasela iPhini likaMengameli, uMnuz Cyril Ramaphosa, ngoba uma engayeki kukhona okusina kumjeqeza.
Ubuholi obusha be-ANCWL KwaZulu-Natal butshele izintatheli ukuthi bukhathele wuNkk Motshekga.
“Siyambona ukuthi usebenzisa amandla akhe njengoMengameli osewaphuma esikhundleni se-ANCWL ukuqoka umholi othandwa nguye. Thina sesikubeke kwacaca ukuthi siseka uDkt Nkosazana Dlamini Zuma,” kusho uSihlalo we-ANCWL KwaZulu-Natal, uNkk Nonhlanhla Khoza.
IPhini likaSihlalo we-ANCWL KwaZuluNatal, uNkk Nomagugu Simelane-Zulu, ugxeke uNkk Motshekga emsola ngokungaziphathi kahle.
“Uma eqhubeka nokuziphatha kabi elokhu ekhankasela iPhini likaMengameli sizocela isigungu esiphezulu ukuthi simqondise ubugwegwe. Uyazi ukuthi kumele aziphathe kanjani ngoba wayenguMengameli we-ANCWL,” kusho uNkk Simelane-Zulu.
Umkhulumeli kaMotshekga, uNksz Troy Martens, uziphikisile izinsolo zokuthi uNkk Motshekga ukhankasela uRamaphosa.
Uthe uMotshekga usefake isikhalo kwi-ANC eGauteng emuva kwezinsolo abekwe zona wubuholi be-ANCWL kuzwelonke ngesonto eledlule.
UNkk Simelane-Zulu uthe ubuholi be-ANCWL bunenqubomgomo yokuthi beseka uDkt Dlamini Zuma, akumele amalungu abo akhankasele abanye abantu.
“Ngisho noNkk Lindiwe Sisulu asimboni edelela isigungu esiphezulu se-ANCWL ngoba uyilungu eliqotho. Siyazi ukuthi uzophuma ekukhankaseleni ukhetho lokwengamela i-ANC ngoba uyahlonipha,” kusho uNkk Simelane Zulu.