Injabulo izwe lisuka ekuzikeni komnotho
IZIHLATHI zizovakashela izindlebe kubantu baseNingizimu Afrika emuva kokuzwa ukuthi umnotho ukhule ngo2.5%.
UMnuz Tandisizwe Mahlutshana oyisazi somnotho ePPS Investments, utshele Isolezwe ukuthi ukukhula komnotho kusho ukuthi uzokwehla umthwalo emahlombe abantu bakuleli ngoba izwe selisukile kwinzikamnotho.
“Silindele ukuthi ibhange lombuso nalo lehlise imali mboleko okusho ukuthi abantu bazokwazi ukuphefumula ikakhulukazi labo abacwile ezikweletini. Ukuba ngcono kwesimo akusho ukuthi abantu mabamoshe imali kodwa kufanele bayilondoloze kakhulu kunakuqala ukuze umnotho uqhubeke nokudlondlobala,” kusho uMahlutshana.
USolwazi Glen Robbins oyisazi somnotho esizimele ubhale ekhasini lakhe likaFacebook ukuthi umnotho ukhulile ngoba yonke imikhakha ikhombisa ukundlondlobala kusukela kowokwakha, owezimoto nokunye.
Uveze ukuthi ezinyangeni eziyisithupha ezidlule umnotho ubukhula ngo-1.1 % kodwa lokhu kushintshile kwazise ukhule ngo-2.5%.
USolwazi Bonke Dumisa oyisazi somnotho esiphinde sixazulule izinkinga zabathengi kwiNational Consumer Tribunal uthe yize kukuhle ukukhula komnotho kodwa akusho ukuthi amathuba omsebenzi azovela maduze kwazise ezinye izinhlangano eziklelisa amazwe ngokomnotho zazingabanikanga izindaba ezinhle abatshalizimali.
“Isimo singcono emikhakheni eminingi kwazise sinyukile nesibalo sezimoto ezidayiswayo. Sike sehla isibalo sezimoto ezidayiswayo kuleli nakwamanye amazwe. Okuhle wukuthi sesiphumile kwinzikamnotho. Lokhu akusho ukuthi abaqashi bazihlomulise ngamabhonasi kodwa kusho ukuthi izinkampani mazibophe isifociya kunganikwa izikhulu amabhonasi amakhulu kodwa abe kahle,” kusho uDumisa.
Uthe uma abaqashi benikwa amabhonasi amakhulu nabasebenzi bafuna ukunyuselwa amaholo ngokweqile bese kuqala kuba nokuphazamiseka emnothweni.
Ugqugquzele abantu ukuthi baqhubeke nokonga amasenti abanawo ze umnotho uthuthuke.