Sithakaselwe yiDenosa isinqumo esithathwe yiSANC
SELUSHAYELWE ihlombe uhlelo lwenhlangano eyengamele ukusebenza kwabahlengikazi kuleli, iSouth African Nursing Council (SANC) lokuya ezifundazweni ixazulula izinkinga zabahlengikazi.
Le nhlangano iya kuzona zonke izifundazwe isize abahlengikazi ngezinto abazidinga kuyo. Kusukela ngoMsombuluko kuze kube uLwesihlanu kuleli sonto le nhlangano iKwaZulu-Natal. Izophinde ibuye emasontweni amabili azayo, ngoSepthemba 18 kuya ku-22. Lokhu kulandela izikhalo eziningi zokuthi ayivule amahhovisi ezifundazweni njengoba inehhovisi ePitoli kuphela. Ekuqaleni kwalo nyaka inyunyana yabahlengikazi iDemocratic Nursing Organisation of South Africa (Denosa) iveze ukuthi omunye wabahlengikazi waquleka ekolayini abade emahhovisi eSANC elinde usizo.
NgokweDenosa lokhu kwakudalwa ukungavumi kwale nhlangano ukuvula amahhovisi ezifundazweni nokuphoqa abahlengikazi ukuthi basuke ezifundazweni ezahlukene baye emahhovisi bese behlala usuku lonke kolayini belinde usizo.
Umgqugquzeli weDenosa KwaZulu-Natal, uMnuz Mandla Shabangu, uthe bayasithakasela isinqumo seSANC ikakhulu njengoba sebekhale kaningi bethi ayibe namahhovisi ezifundazweni.
Uthe uma abahlengikazi bedinga ukulungisa izinto ezithinta umsebenzi kufanele baye ePitoli nokungumthwalo ongenasidingo.
“Sesiyinxuse kaningi ukuthi ayivule amahhovisi ezifundazweni iSANC kodwa ikhala ngemali. Noma kungenzeki lokhu esikufisayo siyakujabulela okuncane abakwenzayo ngoba nakho sasikucelile. Okuhle kakhulu kulo nyaka wukuthi abagcinanga ngokufika kodwa balule nezinsuku abazozichitha besiza abahlengikazi ngoba sebezochitha eziyishumi kunezintathu,” kusho uShabangu.
Uthe okufanele kuqashelwe abahlengikazi wukugwema ukuphatha imali uma kukhona okudingeka bakukhokhele ngoba kusetshenziswa amakhadi asebhange.
Isikhulu seSANC, uNksz Sizeni Mchunu, sithe inhloso yabo ukunika abahlengikazi ithuba lokulungisa abadinga ukukulungisa njengokukhokhela izitifiketi zabo, ukuthenga izipeletu nokunye.