Amasu okwenza ingubo endala ibukeke iyintsha
AKULONA ihlazo ukuphinda ingubo eyodwa emcimbini kodwa kudingeka uyihlakaniphele indlela oyigqoka ngayo.
Lokhu kushiwo ngumsiki wengqephu uMamsie Mkhwanazi we-Afrolicious Designs. Ubephawula ngengcindezi kosaziwayo okudingeka bagqoke izingubo ezintsha njalo uma kunemicimbi. Muva nje ube sematheni unkosikazi kaDJ Black Coffee u-Enhle Mbali Maphumulo oqhamuke kuMzansi Magic Viewers Choice Awards nengubo eyaziwayo.
U-Enhle ongumlingisi akakufihlanga ukuthi le ngubo emhlophe ubengaqali ukuyigqoka. Ubonakale ngayo eseyokwamukela indondo yomyeni wakhe. Ukuphinda kwakhe ingubo kukhulunywe ngakho nasezinkundleni zokuxhumana.
Akuyena kuphela obegqoke ingubo endala kulo mcimbi kodwa nomsakazi uKuli Roberts obegqoke ingubo yesikhumba emnyama. Uthe sekunesikhathi eside ayigcina le ngubo ngoba ibingasamlingani.
Kwesinye isikhathi akukona ukuphinda ingubo okuba yindaba kosaziwayo kodwa nokufaniselana. Ukufakwa kwezithombe ezinkundleni zokuxhumana kwenza kube lula ukuthi nabalandeli bazazi izingubo zosaziwayo, ababuye baziqhathanise nezabanye kweminye imicimbi. Kwenzeka kanjalo ku-Advocate Thuli Madonsela owayegqoke ingubo ephuzi kuvulwa iPhalamende, efana nekaBonang Matheba ayeyigqoke kwiVodacom Durban July.
UMamsie uthi yizinkundla zokuxhumana ezifake kakhulu ingcindezi, ikakhulukazi kosaziwayo besifazane.
“Abantu bacabanga ukuthi osaziwayo banemali eningi, yingakho bebona kuyihlazo uma bephinda izingubo. Ngisho umuntu ebesathanda ukuyiphinda ingubo usaba ukuthi abantu bazokhuluma. Osaziwayo baze bacele abasiki bengqephu ukuthi bababoleke izingubo, ukugwema ingcindezi yokuthenga njalo,” kusho uMamsie othe ikhona indlela yokwenza ingubo endala ibukeke iyintsha.
Ukhuthaza ukuthi uma uthenga kube wumbala ozokwazi ukuwumeshela neminye eminingi. Ulinganise ngengubo ephuzi athe ungayigqoka kaningi kodwa ushintshe amacici nezicathulo. Ungabuye uyigqoke nebhande elingomunye umbala.
Uveza ukuthi nakwabesilisa isikhona ingcindezi kodwa kungcono kubo ngoba iyagqokeka isudi eyodwa bese ushintsha amashethi nothayi.
UThula Zaca ongumsunguli we-Image Collezion, onesitolo sezingubo, ungomunye wabesilisa othi akaziphindi izingubo zokugqoka. Watshela Isolezwe ukuthi akayiphindi impahla esibonwe abalandeli bakhe ezinkundleni zokuxhumana.