‘Asithole ozosakhela ubudlelwano nawaphesheya’
OWAYENGUKAPUTENI weBafana Bafana,u-Aaron “Mbazo” Mokoena, uphonsele inselelo iSouth African Football Association (Safa) ukuthi ithole umuntu ozoyakhela ubudlelwano namaqembu aphesheya kwezilwandle ukuze kuphele umdonsiswano ngabadlali beqembu lesizwe.
UMokoena, osaphethe irekhodi lokudlala imidlalo eminingi kwiBafana Bafana (107) ufakwe kwiSafa emasontweni edlule lapho encela khona ulwazi kuBarney Kujane oyimenenja yeqembu lesizwe. Ungumdlali wesibili emasontweni ambalwa ukusondezwa kwiBafana emuva kokubizwa kukaQuinton Fortune osebenza nomqeqeshi uStuart Baxter.
Ngaphandle kukaFortune noMokoena,uHelman Mkhalele naye owayeyibamba kuBafana, unikezwe ithuba lokuqeqesha iqembu lika-Under 20 elidlala imidlalo yobungani e-England.
UMokoena, omunye wabadlali ababeba nenkinga yokunqatshelwa ngamaqembu abo uma kufanele bayodlalela iBafana, uthe iSafa idinga ukuyisukumela le ndaba ngoba ngeke iphele. “Ngalethula uhla kwiSafa kudala lokuthi ngithungathele iNingizimu Afrika abadlali abangaziwa abadlala ngaphandle. Ngangingeke ngigcine lapho kodwa ngangizoba ngumxhumanisi phakathi kweSafa neqembu ukusiza abadlali ngoba nami ngabhekana nalokho. Ngangifuna ukwakha ubudlelwano. Nginesiqiniseko sokuthi bazolubhekisisa.”
“Lo msebenzi ngikholwa wukuthi kufanele unikezwe umdlali odlale phesheya, wadlalela iqembu lesizwe futhi owuqondayo umbango weqembu nezwe. Le nto inzima kakhulu.Ubona umdlali eyeka ukudlalela iqembu lesizwe ngaphambi kwe-Afrika Cup of Nations (Afcon) kodwa uma sekuzodlalwa iNdebe yoMhlaba usefuna ukubuya. Sisesimeni lapho sidinga umuntu ozoba wumxhumanisi phakathi kweSafa namaqembu ukuze kukhululeke abadlali.”
UMokoena udlale emaqenjini ahlukene phesheya kwezilwandle okukhona kuwo iBlackburn Rovers nePortsmouth kwi-English Premier League (EPL).Wayekhona eqenjini lika-Under 23 elehlula iBrazil kuma-Olympic ngo-2000 e-Australia. Udlale kwi-Afcon ka-2002, 2004 neka-2008.
Uhole iNingizimu Afrika kwiNdebe yoMhlaba edlalelwe lapha ngo-2010.
Uphanyeke amakhokho emgibeni esedlalela iBidvest Wits ngo-2013.
“Uma uya e-Argentina naseBrazil, abadlali bakhona uma kufanele badlalele iqembu lesizwe, bayabatshela abaqeqeshi ukuthi izwe lami lihamba phambili. Yebo, ngiqashwe uwena kodwa ngingowase-Argentina. Ngakho kufanele uziqhenye ngezwe lakho nokuyinto engayenza. Kwesinye isikhathi kwakufanele ngikhethe phakathi kwezwe neqembu kodwa ngangihlale ngithi izwe lami lihamba phambili.”
Uthe ukufakwa kwabo ezinhlakeni zeSafa kufanele ngabe kade kwenzeka. Uyena oqonde kwiSafa wayoziphendlela isikhala. “Ngakhuluma noDenis Mumble, wangibuza ukuthi yikuphi lapho engibona ukuthi ngingabamba khona. Wabona ukuthi uBarney ufuna usizo.”