Okuthenjiswa wuJohnson kowabakhaya
UTHEMBISA ukunika impi iMaritzburg United umqeqeshi waMaZulu FC, uCavin Johnson, njengoba la maqembu aKwaZulu-Natal ezothuthana kowabakhaya eKing Zwelithini Stadium ngoLwesibili oluzayo.
Umdlalo ozobe ungowesithathu we-Absa Premiership uzoqala ngo-7.30 ebusuku.
La maqembu azohlangana ngesikhathi eyimpumalanga nentshonalanga ngokwezinga lokudlala nemiphumela asayitholile selokhu kuqale isizini ka-2017/2018. IMaritzburg edlala kwiMTN 8 ngemuva kokuqeda isizini edlule ishayela phezulu, ayikahlulwa kule sizini.
Ikwazile ukuzibekisela indawo kweyandulela owamanqamu kulo mqhudelwano kanti kuligi ayikehlulwa. Isiqoqe amaphuzu ayisithupha iqumba phansi iPlatinum Stars ne-Ajax Cape Town ngo 2-0.
AmaZulu wona asazama ukubamba isitayela somqeqeshi omusha uJohnson. Uthathe leli qembu okufana nokuthi liqalwa phansi njengoba kuhlanganiswe abadlali beThanda Royal Zulu naboSuthu. Uvule isizini ngokunqoba ngengcacamezela ka 1-0 kwiFree State Stars. Emdlalweni olandelile babuye belambhatha behlulwa iChippa United ngo 2-0 ekuhambeni.
Nokho uJohnson uthembise ukuthi uzobonakala umehluko ngemuva kokuthola ikhefu lamasonto amabili ngenxa yemidlalo yeFifa.
“Kuningi esikulungisile nabadlali, yize ungeke uthi usuqedile. Kodwa ngiyakholwa wukuthi umdlalo olandelayo uzofika sesiwulungele. Ngemuva kokwehlulwa yiChippa sikwazile ukubuka kahle lapho esenze khona amaphutha kuleli khefu, sakwazi ukuhlangana kangcono njengeqembu okuyiyona into emqoka ukuthi siyenze ngokushesha.
“Lona ngomunye wemidlalo emibili yabakhaya esiba nayo, ngethemba ukuthi sizokwazi ukumelana nabo, sinikeze abantu baseKing Zwelithi umdlalo osezingeni,” kusho uJohnson.
Egcina ukuhlangana la maqembu ngesizini ka-2014/2015 ngaphambi kokuthi AmaZulu adliwe yizembe, iTeam of Choice yanqoba ngo 2-1 kudlalelwa esibayeni soSuthu. Emlenzeni wasekuhambeni umdlalo waphela ngo 1-1.
UJohnson uthe uma bezimisele ngokuzinza esigabeni esikhulu kufanele balikhuphule izinga kule midlalo emihlanu kaSepthemba.
“Ngikholwa wukuthi sinabadlali abazokwenza iqembu elihle. KuSepthemba sizoba nemidlalo okumele senze kangcono kuyona.”
Ngemuva kokubhekana neTeam of Choice, AmaZulu azoya kwiLamontville Golden Arrows, amukele iBidvest Wits nePlatinum Stars bese evala inyanga ngokuya kwiSuperSport United.