Uphendla ebheke ezimpini zawomhlaba
UBHEKE ukuziphendlela indlela ebheke ezimpini zamabhande amakhulu emhlabeni umpetha we-SA female middleweight,uMapule Ngubane, ozoxhimfana nomakadebona uNoni “She Bee Stingin” Tenge kweyebhande le-World Boxing Federation (WBF) junior middleweight eGauteng ngoLwesihlanu ebusuku.
UNgubane waseSmero, eMgungundlovu, KwaZulu-Natal, omunye wabashayisibhakela besifazane abanekhono kodwa ababhekene nenselelo yokwentula izimpi eNingizimu Afrika. Ungene endaweni kaSandra Almeida waseEast London ongumpetha we-SAsuper lightweight obekufanele kube nguye obhekana noTenge. Kuvele ukuthi u-Almeida uhoxile ekhala ngokwaziswa ngempi sekusele izinsuku ezimbalwa. Lokhu kuvulele intuba uNgubane kulezi zimpi ezihlelwe nguMbali Zantsi weShowtime Promotions ezibizwa ngeWomen Only ezizoba seKagiso Memorial and Recreational Centre.
“Ngizilungiselele kahle noma ngibe nesikhathi esincane sokulungiselela impi ngoba ngitshelwe ngayo ekupheleni kwesonto eledlule. Kodwa ayikho into ebengingayenza ngoba impi bengiyidinga. Ngizozama ngakho konke. Njengompetha waseNingizimu Afrika angikwazi ukuhlehlela emuva,”kusho uNgubane. “Leli yithuba elikhulu kimina, lizongivulela eminye iminyango ebheke emabhandeni amakhulu engifuna ukuwalwela afana ne-WBC, IBF ne-IBO.” Phezu kokuba amabhokisa esifazane ebhekene nengwadla yokwentula izimpi kodwa isinyathelo seBoxing South Africa (BSA) sokuqinisa isandla ngezimpi zayo sibukeka sizoshesha ukuthela izithelo. Emasontweni edlule i-SABC ikhiphe isaziso ngamathenda ezimpi ezizovezwa kulesi siteshi. UNgubane ugcine ukungena eringini ngenyanga edlule ehlula uXolelwa Soka empini ebikade iseMdantsane Indoor Sports Centre, e-East London. Uzobhekana noTenge okunguye kuphela umshayisibhakela wesifazane osephathe ibhande le-International Boxing Federation (IBF) nagcine eliphuciwe ngenxa yokungalivikeli. “Kuzona zonke izimpi zami noma ngabe ngibhekene nayiphi imbangi, abantubayazi ukuthi bazobona into yangempela. Noma ngingahlulwa kodwa ngizobe ngisuke ngiyixebulile imbangi yami,” kusho uNgubane.