AmaProteas ashaye i-England okokuqala
KUBE wusuku oluyingqophamlando eqenjini lesizwe le-netball amaProteas ngesikhathi eshaya i-England emdlalweni weSanzea Quad Series eNew Zealand ngoMsombuluko.
AmaProteas aqumbe phansi i-England Ross ngo 54-51 okokuqala kusukela ngo2013. Elakuleli belinqoba okokuqala kulo mqhudelwano.
Ukaputeni weNingizimu Afrika,uBongi Msomi, ubonge amagalelo omqeqeshi uNorma Plummer selokhu afika eqenjini. UPlummer wayeyisilomo somdlali we-netball e-Australia ngaphambi kokuthi angene kwezokuqeqesha.
Leli lizwe lingelinye lahamba phambili kulo mdlalo.
“Kuwumuzwa omuhle kakhuluukushaya iqembu elikleliswe kwamathathu aphezulu emhlabeni. Besilokhu sisebenza kanzima futhi besazi ukuthi sizokwazi ukuqhudelana namaqembu lapha. Ukuba nomqeqeshi ofana noNorma Plummer kusinikeza ukuzethemba njengoba silokhu siya ngokuqina,”kusho uMsomi.
Ukudlondlobala kweqembu lamaProteas kubonakele nangesikhathi la maqembu edlala eThekwini ngoJanuwari,umdlalo wagcina uphele ngo 60-55 kunqoba i-England esikhathini esengeziwe ngemuva kokuthi uphele zibambene ngo 48-48.
UPlummer wamjabulisa lo mphumela ebalula igebe elincane lamaphuzu ababehlulwe ngawo ekubeni phambilini belivamise ukuba likhulu.
Iqembu likaPlummer likhombise ukungayesabi i-England zibekwa njengoba bezilokhu zishintshana ngamagoli, lagcina linqobe ikota yokuqala yomdlalo ngo 13-11.
Kwikota yesibili amaProteas aphinde alivula igebe ngaphambi kokuthi i-England ibuye kwayiwa ekhefini kulingwana.
Sekubuywa aqhubekile nokulawula umdlalo, isisu sibanjwe u-Erin Burger, uMsomi, noPrecious Msomi abadlala ezinhlangothini.
Abadlali basemuva uKarla Mostert noPhumza Maweni nabo bebeyincisha umoya i-England kanti uLenize Potgieter ubesefomini njengoba wonke amabhola eze kuyena kwikota yesithathu neyesine ewavalele phakathi.