UHunt uyibona izophela maduze inhlanhla kaBenni
KUFANA nesibusiso kuGavin Hunt opheka iBidvest Wits akubona kwenziwa wumdlali amnika ithubaebholeni elikhokhelayo uBenni McCarthy osengumqeqeshi weCape Town City.
Leli qembu laseKapa lihamba phambili ngo 1-0 kwiWits ngaphambi kowomlenze wesibili weMTN 8 ongeSonto ngo-3 ntambama eBidvest Stadium. EzikaBenni yizona futhi ezithele othulini iWits ngo 1-0 emdlalweni wokuqala we-Absa Premiership.
UHunt, okunguyena oveze uBenni njengomdlali kwiSeven Stars eminyakeni ecela kwengamashumi amabili edlule,uthe nakuba ekujabulela okwenziwa wuBenni kodwa inhlanhla yokuba yingane izophela. Kusukela eqalile ukusebenza kwiCity uBenni (39) akayazi induku njengoba ebheke ukudlulela phambili kulo mqhudelwano onentshontsho lika-R8 million.
“Kusobala ukuthi ibhola lilula kuyena. Anginawo amaningi ngaphandle kokuthi asimjabulele njengoba inhlanhla yobungane isahamba naye. Kuzoshintsha konke lokhu, ngikholwe. Angikusho lokhu ngoba nginomona kodwa ngikhuluma iqiniso. Nokho kusobala ukuthi kukhona okuhle akwenzayo ngakho-ke ngingamyala ngokuthi akaqhubeke,” kusho uHunt. UHunt, okunguyena futhi oviikela isicoco seMTN 8, akayiboni inkinga endleleni iqembu lakhe elidlala ngayo kodwa imiphumela iyona eyinkinga. “Nakowomlenze wokuqala besiyiqembu elingcono kodwa sahlulwa. Yibhadi nje elikhona okuyinto eke yenzeke kunobhutshuzwayo. Okumele sikwenze thina wukugwema amaphutha esiwenzayo bese siqinisekisa ukuthi siwasebenzisa ngendlela amathuba ethu. Uma singakwenza lokhu nakanjani siyaya kowamanqamu,”kusho uHunt.
Uthembise ukuqala lo mdlalo ngoPhakamani Mahlambi obeye ePortugal eyozama khona inhlanhla kwiVictoria Guimaraes ebidlalelwa uBongani “Ben 10” Zungu.
“Ubuye nomkhuluumfutho ePortugal. Ngicabanga ukuthi yingoba bebemdlalisa emuva. Uthe kimina usefunde lukhulu ngokuvimba izitha. Kodwa mina ngeke ngimdlalise emuva. Ngimdinga phambili ukuze lo mlingo awuphiwe usisebenzele. Bekunzima nokho ukulungiselela lo mdlalo ngoba abadlali abaningi esiqala ngabo imidlalo basemaqenjini esizwe ehlukene. Ngenxa yalokho kunabadlali abaningi abangibonisile ukuthi sebekulungele ukudlala emidlalweni yobungani esiyidlale kulezi zinsuku ezedlule,” kubeka uHunt.
Ngaphambi kwalo mdlalo kuzoqala iMaritzburg United neSuperSport United ababambane ngo 1-1 emlenzeni wokuqala. Owesibili ungoMgqibelo ngo-8 ebusuku eHarry Gwala Stadium, eMgungundlovu.