Izoyigubha nabalandeli iminyaka ewu-20
LIHLELA ukuyigubha nabalandeli balo baseNingizimu Afrika nabasemazweni angaphandle iminyaka ewu-20 langena emculweni iqembu iMafikizolo.
Ngo-Okthoba 20 izokhipha i-albhamu yayo entsha.
Enkulumeni ekhethekile neSolezwe iMafikizolo ithe ifihle induku emqubeni nge-albhamu entsha.
IMafikizolo ithe ngeke ibadalule abaculi esebenze nabo ukuhlanganisa i-albhamu ngoba kukhona ngisho abaphesheya kwezilwandle.
UTheo Kgosinkwe noNhlanhla Nciza bathe ayikho indlela ababona ingcono yokubonga abalandeli babo kunokuba bahlanganyele nabo edlilini lomculo abalihlelayo.
“Sizoqala ukuhambela izindawo ezehlukene kusuka kulo nyaka uma sekuphume i-albhamu kuze kube wunyaka ozayo. Sijabule ngothando abantu abasinike lona kuyo yonke iminyaka edlule sisangena emculweni kungelula,” kusho uTheo.
Uthe uthando abaluthole kubantu lufana nse nabaluthola kubantu bakwamanye amazwe abawahambelayo.
UNhlanhla uthe bekungekho lula kule minyaka edlule njengoba bebhekane nezinselelo ezahlukene.
“Ukudlula emhlabeni kwelinye ilungu esasisebenza nalo kwaba buhlungu. Kodwa zikhona nezikhathi ezimnandi esibe nazo emculweni. Ngakho manje sizoqhubeka sigubhe nabalandeli bethu ngomculo ngoba i-albhamu isizophuma,” kuchaza uNhlanhla.
Uqhube wathi: “Ngeke sisho ukuthi obani abaculi esisebenze nabo bakwamanye amazwe kule albhamu ezayo kodwa bona bakhona. Sifuna ukushiya abalandeli bethu bebambe ongezansi.”
Ingoma yabo entsha ethi Love Potion uthe ingenye yezizotholakala ku-albhamu yabo entsha eseyinezingoma eziwu-15 manje.
IMafikizolo ingelinye lamaqembu abezonandisa emcimbini obuhlelwe yisiteshi somsakazo i-East Coast Radio eBotanic Gardens eThekwini, izolo.
Emcimbini kugqame ukubumbana kwezinhlanga ezehlukene THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. ebezijabulela umculo, amahlaya nemibukiso yezimpahla ezahlukene.
IMafikizolo ishaye izingoma zayo ezindala okubalwa kuzo iKhona nezinye. UNhlanhla uphinde wakhombisa nethalente lakhe lokudijeya eklwebha amapleti.