Idlule namalungu omndeni ayisikhombisa eyemoto
BAKHALA ngebhuloho elingekho esimeni esihle ngokushona kwamalungu omndeni ayisikhombisa engozini yemoto ekhalakathele edamini KwaMaphumulo ngeSonto.
Umndeni wabashone ngesikhathi imoto ingena edamini iMvutshana, KwaZubane ngeSonto ufisa kulungiswe ibhuloho elihamba phezu kwedamu. Lesi sigameko senzeke emuva kwehora leshumi nanye emini.
Amalungu omndeni wakwaNcalane abelibangise eNsuze emcimbini wokubuyisa isihlobo sawo ngesikhathi kwehla ingozi.
Kule ngozi kushone uMnuz Zwelihle Welcome Ncalane obaziwa ngoPhumlani (34), amadodana abafowabo uSamkelo Ncalane (17), Thabiso Ncalane, Wonder Ngcobo (17), umkamfowabo, uNksz Gqamile Mpungose (31), izingane zakhe ezimbili u-Abongwe Ncalane (3) noNkazimulo Ncalane obenezinyanga eziyishumi.
UMnuz Khetha Ncalane uthe abazi ukuthi yini edale ingozi ethathe umfowabo nezingane zabafowabo wathi bazolinda umbiko wengozi. Uthe imoto ebinamalungu omndeni bekungeyesihlobo sabo ebesiyiboleke uPhumlani ukuze ayolanda uNksz Mpungose nezingane abayise emcimbini.
UNcalane uthe bakhathazekile ngebhuloho okuthiwa lakhiwa ngo-2014. Uthe bafisa sengathi ingabhekisiswa indaba yokulungiswa kabusha kwebhuloho akhale ngokuthi liyingozi.
“Umgwaqo oyela edamini uyehlela futhi awumuhle. Phezu kwalokho ibhuloho alinazo izinsimbi noma udonga oluphakeme obelungasiza ekutheni imoto ingaweli edamini. Leli damu lisanda kwakhiwa kodwa selidlule nemiphefumulo eyisikhombisa. Asibona onjiniyela kodwa siyabona ukuthi kukhona okusadingeka ukuthi kwenziwe kulona ukuze kuphephe umphakathi,” kusho uNcalane.
Baphinde banxusa ukuthi kufundiswe amalungu omphakathi ngokutakula njengoba kuvele ukuthi amalungu omphakathi ayibone isangena emanzini imoto kodwa ahluleka ukusiza abebephakathi kuyona.
UNcalane uthe elinye ilungu lomphakathi lizamile ukusiza labamba uPhumlani kodwa lahluleka ukuphuma naye emanzini. Leli lungu lomphakathi nalo ligcine selidonswa ngentambo selikhishwa emanzini. Ubonge amaphoyisa nabezimo eziphuthumayo ngomsebenzi abawenzile wokuthola izidumbu njengoba zitholakale zonke ngeSonto.
UNgqongqoshe wezokuThutha uMnuz Mxolisi Kaunda usenxuse abaphenya izingozi ukuthi baphuthumise uphenyo ngezingozi ezenzeke kule mpelasonto esifundazweni nezidlule nemiphefumulo engu-14.
“NjengoMnyango wezokuThutha sikhathazekile kakhulu ngokunyuka kwesibalo sezingozi zomgwaqo nokufa kwabantu esifundazweni. Okusikhathaza kakhulu wukushona kwabantu abangaphezu kwabahlanu engozini eyodwa njengoba kwenzekile engozini yaKwaMaphumulo lapho kushone khona abantu abayisikhombisa. Lesi yisimo esibuhlungu nesidinga ukuthi sigqugquzele ukubaluleka kokuphepha emgwaqweni,” kusho uKaunda.