I-ANC ayisiyo inhlangano yomndeni: Cele
njengomholi,” kusho uCele.
Utshele abantu ukuthi ubengakamkhethi azomeseka ngoba abantu bebengakaqoki muntu emagatsheni kodwa weseka umgomo we-ANC wango-1949 othi umuntu oyiPhini likaMengameli kufanele engamele le nhlangano uma umengameli okhona esethatha umhlalaphansi.
“Salimela iqiniso kuyiwa okhethweni lwasePolokwane, lelo qiniso lithi iPhini likaMengameli kufanele lingene esikhundleni sokwengamela i-ANC uma kuphuma umengameli. Uma i-ANC izimisele ngokubuyisa ithemba kubantu nokuthatha omasipala abasilahlekele kufanele kuqhutshekwe nemigomo nohlelo lokukhetha obelusebenza kudala,” kusho uCele.
Uphinde wakhala ngokuthi i-ANC ayiphethe Ekurhuleni ngoba isebenzisana neqembu eliphikisayo wakhala nangokuthi i-ANC ayithenjwa eNelson Mandela Bay ngenxa yokuthi abaholi bayo bakhohlakele futhi bakude nabantu.
“Uma izinto ziqhubeka kanjena kusho ukuthi i-ANC ngeke iphathe kuze kubuye uJesu. Kufanele silalele abantu senze okufunwa yibona,” kusho uCele.
Uthe ngoLwesihlanu isigungu esiphezulu se-ANC besidingiga udaba lwesinqumo senkantolo yaseMgungundlovu ethe ingqungquthela yango-2015 yayingekho emthethweni.
“Kukhona abebethi ubuholi be-ANC baKwaZulu-Natal kufanele buhlakazwe abanye bethi abenziwe iProvincial Task Team (PTT) kodwa abaningi bathe kufanele buhlakazwe bese kwakhiwa isigungu esizobhekela isifundazwe esihlanganisa zonke izinhlangothi,” kusho uCele.
Mayelana nokuthi i-ANC ingase isiphikise isinqumo senkantolo, uCele uthe leso sinqumo sizothathwa wubuholi be-ANC kuzwelonke uma sebuhlangana ngesonto elizayo.
Uphinde waveza ukuthi useke wasatshiswa ngokuphucwa onogada nezimoto ezinamalambu aluhlaza ngenxa yokuthi ugxeka ubuholi bukaMengameli Jacob Zuma.
“Akekho umuntu onelungelo lokuxosha abantu kwi-ANC. Ngeke ngithule noma ngingasatshiswa ngokuphucwa onogada futhi angisoze ngayishiya i-ANC. Asiyazi i-ANC exosha abantu sazi egqugquzela abantu ukuthi bangene kuyona,” kusho uCele.