Kulindwe abameli nomkhombandlela ngesinqumo secala labe-ANC
UMGCINIMAFA we-ANC uDkt Zweli Mkhize uthi balinde abameli abaqokwe yisigungu esiphezulu sale nhlangano babatshele ukuthi basidlulise isinqumo senkantolo yaseMgungundlovu ngodaba oluthinta ukuhlakazwa kobuholi baKwaZulu-Natal obakhethwa engqungqutheleni yango-2015.
UMkhize uthe kwakungamele udaba luye enkantolo ngoba olwangaphakathi kwakumele luxazululwe ngaphakathi.
“Abameli bazosho ukuthi uma siya phambili siya kanjani ngoba asifuni kube nogcobho.
Asifuni kuphinde kungenele inkantolo isinquma ngendlela ethile njengoba sibheke engqungqutheleni ngoDisemba.
Uma singadluliswa lesi sinqumo kuzobhekwa eyethimba lesifundazwe elizobunjwa,” kusho uMkhize.
Ubekhuluma emhlanganweni weSanco, eThekwini lapho ephakanyiswe ukuthi angenele umbango wokuhola i-ANC ngoDisemba.
Usho lokhu nje umhlangano wesigungu esiphezulu unqume ukuthi kuqokwe ithimba lesifundazwe elizofaka zonke izinhlangothi ezinyangeni eziyisishagalolunye.
“Uma kunezinkinga kumele kuxoxwe, kuvunyelwane zilungiswe izinto. Zazikhona izinkinga kuyiwa kule ngqungquthela yango-2015, sazibamba ezinye zingakabhebhezeleki ngoba i-ANC kumele yenze lokho zingaze zibe ilangabi,”kusho uMkhize.
Uxwayise amalungu e-ANC ukuthi angakhethi abaholi abakhohlakele uma sekuyiwa engqungqutheleni ngoDisemba.
UMkhize uthe kunabaholi abadala uqhekeko kwi-ANC. “Kumele sikhulume ngezwi elilodwa, abanye babaholi badala uqhekeko. Siyawadinga amadlelandawonye ngoba ngeke sikwazi ukuthi abanye bavote ngeyabo indlela nathi siye le,” kuqhuba uMkhize.
Uthe uma abaholi benze amaphutha kumele baphumele obala bawavume, baxolise bese bengawaphindi.
UNobhala weSanco esifundazweni, uMnuz Richard Mkhungo, uthe bahambele izifunda ezehlukene bezwa uvo lwamalungu ale nhlangano ngokuthi ifuna kube ngobani abaholi ngoDisemba.
Uthe baye oKhahlamba, Far North, Malahleni naseThekwini zonke ezifuna uMkhize abe ngumengameli. “Sizobe sesiya kubuholi bukazwelonke siyosho ukuthi naba abaholi amagatsha abafunayo ngoDisemba.
UMkhize nguyena ophakanyiswa amagatsha,” kusho uMkhungo.
ICosatu, SACP neSanco kuzwelonke beseka uMnuz Cyril Ramaphosa kwesobumengameli.