Idili lomculo noTD Jakes nezinkulumo
UZOTHELEKA ngoLwesine kuleli umfundisi wodumo lwezinkulumo ezakhayo nomculo, ozoba yingxenye ye-Essence Festival eqala namuhla eThekwini.
UMbhishobhi TD Jakes waseUnited States of America (USA), uzobe esekhonsathini yomculo wokholo elizoba ngeSonto eNkosi Albert Luthuli, ICC. Kulindeleke ukuthi kube nesithangami nabezindaba lapho kuzocaciswa ngezinhlelo zakhe njengoba ezoba esesithangami sosomabhizinisi ngoMgqibelo ekuseni.
UMbhishobhi TD Jakes futhi ongumbhali wezincwadi, uzocula neJoyous Celebration ekhonsathini langeSonto, i-Essence All Star Gospel. Uzobe engaqali ukushiyelana inkundla naleli qembu elisanda kuqopha naye.
Esitatimendeni esithunyelwe Isolezwe, lo mbhishobhi uthembise ukufundisa ngezindlela zokukhulisa amabhizinisi nokholo. Amathikithi esithangami samabhizinisi noTD Jakes asatholakala ema-computicket nawekhonsathi lokuvala asatholakala.
Enye ikhonsathi ebhekwe ngabomvu ngoMgqibelo ibophele uJill Scotts wase-USA ozotheleka ngoMgqibelo kuleli. Lo mculi olingisa nasefilimini ethi Why Did I get Married, uboshelwe noNasty C, Babes Wodumo, MiCasa noKhuzani.
Bangaphezu kuka-60 000 abathamela le festiveli ngonyaka odlule, okungenzeka isibalo sikhule nonyaka. Ngaphandle kwamakhonsathi, kukhona nesithangami iWomen Economic Empowerment Engagement okuthiwa amathikithi aso asephelile. Kulesi sithangami kuzobe kukhona uJohanna Mukoki, Lindiwe Rakharebe, Bongi Shangase noRapaleng Rabana. Kwesamabhizinisi kukhona uDkt Judy Dlamini, Thulisile Mhlungu, Darrin L. Harris noMnuz Vivian Reddy.
Umlingisi uNomzamo Mbatha ongomunye wamanxusa e-Essence Festival ozophatha nohlelo kweminye imicimbi, uthe uyathemba ukuthi umcimbi uzofukula abesifazane nentsha.
Kubikwa ukuthi ngonyaka odlule i-Essence yangenisa inzuzo elinganiselwa ku-R230 million esifundazweni. Kulindeleke izibalo zikhule nonyaka.
UNkk Zandile Gumede oyiMeya yeTheku, uthe uyajabula ukuthi idolobha lizophinde lisingathe le festiveli.
“Lona umcimbi wokuveza amakhono, ubuciko nokuthuthukisa amabhizinisi. Angingabazi ukuthi ulwazi oluzolethelwa intsha, luzoyithuthukisa kakhulu,”kusho imeya.
Umphakathi ofuna ukuya kwiEssence Festival ungathola ulwazi emahhovisi kamasipala njengoba eminye imicimbi ingadingi mathikithi.