INdlunkulu igubhe isemanzini
YETHULE inkulumo eMkhosini weLembe, KwaDukuza ngeSonto izihudula, iMbube ngemuva kwezindaba ezishaqisayo zokudlula emhlabeni kwabantwana baseNdlunkulu ababili okuthiwa babe sengozini yemoto netekisi emgwaqweni u-N2 ngaseGingindlovu, ngoMgqibelo ebusuku.
UmNtwana uMthokozisi wasoSuthu nomNtwana uSipho waseNtembeni kuvele ukuthi bebethunywe yiSilo ukuyobheka ukuhleleka kwezinto ngaphambi kosuku olukhulu lomgubho woMkhosi weLembe ngesikhathi imoto abebehamba ngayo ishayisana netekisi ku-N2, ngaseGingindlovu.
Okhulumela iNdlunkulu umNtwana Mbonisi Zulu uthe okwamanje abakavumeleki ukudlulisa imininingwane kwabezindaba ngalolu daba.
Ethula inkulumo yakhe emgubhweni weLembe, uNdunankulu kaZulu umNtwana uMangosuthu Buthelezi uthe kuqaqamba izinhliziyo ngefu elimnyama elisibekele iNdlunkulu noZulu wonkana.
“Badlule emhlabeni ngokukhulu ukuzuma njengoba bebephikelele KwaDukuza ukuzohlonipha umbumbi wesizwe samaZulu inkosi uShaka behlonipha neSilo uZwelithini. Izindaba zokudlula kwabo emhlabeni zisishaqise kakhulu. Nakuba sonke silahlekelwe siyisizwe kodwa sikhalisana kakhulu neNdlunkulu nenkosi yethu,” kusho uButhelezi.
Uchaze umNtwana uMthokozisi ngokuthi ubesekhaleni ekuhlelweni kwemicimbi nemigubho ethinta iNdlunkulu. Uthe kusazozwela kakhulu ukungabi bikho kwakhe ekuhlelweni kwemicimbi eNdlunkulu.
Ufisele ukululama ngokushesha ababili okuthiwa balimale kule ngozi. “Njengoba ngimi lapha phambi kwenu, ngime ngesikhathi esinzima kakhulu eNdlunkulu. Okwenzekile sikuthatha ngokuthi bekuyizinhlelo zikaNkulunkulu ngakho akukho ebesingakwenza ukukuvimba,” kusho iSilo.
Simememezele ukuthi umgubho wosuku lukaDewali nonyaka ozoba ngoNovemba 7, uzoba sesigodlweni oSuthu.
Sikhwele sadilika kwabasigxeka ngobudlelwano nabohlanga lwamaNdiya. “ILembe libumbe isizwe sabamnyama, mina uNkulunkulu ungilethe ngesikhathi lapho kumele ngibumbe zonke izizwe zibe yisizwe esisodwa kodwa zivumelane ukuthi ngiyinkosi yazo,” kusho iSilo.
Sikhale ngoMnyango wezokuBusa nokuBambisana ngokukhomba amakhosi ngaphandle kokuthi kuxhunyanwe naso.
“Kudala amakhosi ebeza ukuzokhonza eLembeni, liwahlonipha futhi liwazisa ngoba ayengamaqhawe alo. Manje awasezi kimi la makhosi eningigcobela wona. Ngikhuluma nje kunengxoviya kulo lonke izwe ngoba uhulumeni uwabeka ngingakawuhloli nomlando wabo ukuthi uyabavumela yini ukuthi babe ngamakhosi,” kuqhuba iMbube.