URamaphosa nesiqiniseko ngamaCommonwealth
ITHIMBA laseNingizimu Afrika ebeliholwa yiPhini likaMengameli waseNingizimu Afrika, uMnuz Cyril Ramaphosa, emcimbini wokufaka izicelo zokusingatha iNdebe yoMhlaba ka-2023 yebhola lombhoxo, lifunge lagomela ukuthi ayikho ingozi yokuphindwa okwenzeke kumaCommonwealth Games.
INingizimu Afrika isanda kuchitha izindodla zemali ikhankasela ukuthi iTheku lisingathe amaCommonwealth Games ka-2022. Kuthe sekukhulunywe kwaqedwa, iTheku selilitholile negunya bachitheka bugayiwe isihoxa iNingizimu Afrika.
URamaphosa, obehola ithimba lezicukuthwane zikahulumeni nezeSouth African Rugby Union (Saru), uthe ngeke kuphindeke kwenzeke lokho ngoba imali isisebhange.
“Esicelweni sokusingatha amaCommonwealth kwakunenkinga yokuthi sasingazi ukuthi yini ngempela okufuneka igcine ikhishiwe (esho imali). Uhulumeni okuyiwo owengamele imali yomphakathi kumele wazi ukuthi kufanele uhambe ufike kuphi,” kusho uRamaphosa kwabezindaba ngemuva kokubhekana nezikhulu ze-International Rugby Board eKensington.
“Kulokhu, kuhluke kakhulu ngoba ibekwe obala imali uhulumeni okumele uyikhiphe. Bekucace kakhulu ukuthi kufuneka leli phesenti. Kube sekusala kuye uhulumeni ukuthi lokhu singakuqinisekisa.
“Emkhankasweni wokuthi iTheku lisingathe amaCommonwealth sasingenalo ulwazi lokuthi malini ngempela okumele siyiqinisekise ukuthi sizoyikhipha. Ukube beza kithi nento eqondile nohulumeni ngabe waba nempendulo ehlukile,” kugcizelela uRamaphosa.
Wenanelwe nguFrancois Pienaar, owayengukaputeni wamaBhokbhoko, iNingizimu Afrika isingatha iNdebe yoMhlaba ngo-1995.
“Ngeke nangephutha kwenzeke okufanayo ngoba konke sekugxiviziwe futhi osekuvunyelwene ngakho ngeke kusashintsha. Izinkundla zikhona nayo yonke ingqalasizinda. Akukho okusha okusazokwakhiwa. Okusele nje wukuzithuthukisa ngezobuchwepheshe ukuqikelela ukuthi ziyobe zisezingeni elihambisana neminyaka yabo-2023,” kusho uPienaar.
Ephendula umbuzo wenye yezintatheli ngezigameko zobushokobezi uthe: “Siyazwelana namazwe abhekene nezinkinga zobushokobezi. Thina siyaqinisekisa ukuthi sizosingatha umqhudelwano ongenazo lezo zinkinga. Sizosungula nezinhlaka eziqondene ngqo nalokho.”
Uhulumeni uzibophezele ngokutshala u-£160 million (R287 416 000). Le mali yeve ngo-R40 million kwebidingeka.