Masibambisane silwe nobubhoklolo obudlange ezikoleni
IYA inyukela inkinga yobubhoklolo nodlame ezikoleni nokusho ukuthi kumele kube nezinyathelo ezinqala okumele zithathwe ukuqeda lesi sihlava.
Sekukaningi kuvela ukuthi ezikoleni kunezingane ezihlukumeza ezinye zibe ngamabhoklolo. Kwezinye izehlakalo kuze kuphume nomphefumulo.
Isehlakalo esibike ngaso ngeledlule sokuzilengisa komunye umfundi oneminyaka engu-17 singesinye sezibonelo zalokhu.Ngokusho komndeni, uzilengise ngemuva kokusolwa ngabanye abafundi afunda nabo eGanges Secondary, eMerebank, eThekwini, ngokuthi untshontshe iselula.
Abagcinanga ngokumsola kepha bamshaye kanzima kwaze kwalamula umuntu obedlula ngendlela obese ebona kuphihlizwa ibhodlela okusolwa ukuthi bekuzogwazwa umfundi ngalo.
Okwenzeke kulo mfundi akumele kushaqe umndeni nesikole kuphela kepha kumele kuphaphamise wonke umzali ngoba abafundi abahlukumeza abanye nabo basuke benabazali.
Ngabe mzali ingane yakho uyayixwayisa yini ngobungozi nomthelela wobubhoklolo nokuhlulumeza ezinye izingane?
Ngeke sasola uthishomkhulu noma othisha ngalesi sihlava sobubhoklolo ezikoleni ngoba yijoka eliqondene ngqo nabazali.
Yebo uMnyango wezeMfundo unazo izinhlelo zokulekelela ekulweni nalesi sihlava sokuhlukumezana kwabafundi nodlame ezikoleni kepha ingcabha enkulu isele kubazali.
Kumele abazali baxoxe bafundise izingane indlela okumele ziziphathe ngayo esikoleni nasemphakathini nje.
Akekho umzali ofisa ingane yenze okuphambene kepha kuke kwenzeke ngoba izingane zibuye zishintshe uma sezingekho phambi kwabazali.
Yize kunjalo, abazali kumele bangaphelelwa amandla okukhulisa izingane ngobuqotho.
Abazali okuthi uma izingane zabo zonile esikoleni bangezi uma bebizwe ngabaphathi bangezinye zezimbangela zokuthi kube nabafundi abangamabhoklolo ezikoleni.
Masibambisane nabaphathi bezikole noMnyango wezeMfundo ukulwa nalesi sihlava esihlukumeza izingane zethu.