UMbalula angashebi ipolitiki nomsebenzi womphakathi
MHLELI: Ngiyabingelela kwelakho. Ngithi ake ngiphinde ngisike elijikayo njengesakhamuzi esimile sibuka futhi sithinteka kuzo zonke izinto ezenzekayo kuleli lakithi, ikakhulukazi emkhakheni wezombusazwe.
Ngisukunyiswa wukubulawa kwabantu bakithi kangaka ngoba nje bengabaholi, ikakhulu kule nhlangano uKhongolose. Mhlawumbe kungasiza nokubuka ukuthi umsuka ukuphi ukuze phela kulungiswe lapho ngoba izinkulumo eziningi ezenziwa ongqongqoshe, ikakhulukazi wamaphoyisa kuzwelonke zingagcina naye sezimehlisa isithunzi kakhulu uma naye etholakala ukuthi ubhajwe kulolu daka lwezinkulumo ezingakhi.
Mhleli kuletha ungabazane kuNgqongqoshe uMnuz Fikile Mbalula uma yena engumvikeli womphakathi ezozwakala emithonjeni yezindaba ethi abazovotela ukuthi uMengameli Zuma akaphume esikhundleni bafana nabathwele iziqhumane ezizobulala ngisho bona. Kusho ukuthini lokho kumuntu odinga ukuvikelwa njengo Dkt Makhosi Khoza nabanye abaphumela obala ukuthi uMengameli Zuma akehle? Kusho ukuthini ukuba athi usemtholile obesongela uDkt Khoza aqhubeke athi yingane yaseWestern Cape ehlobene neDA kodwa angasitsheli ukuthi wenze njani ngalokho njengomphathi wamaphoyisa? Ngeke abukeke engumuntu othembekile odlala umdlalo wepolitiki kungenasidingo. Ayiboshiwe ngani leyo ngane? I-DA uzoyibeka icala njengeqembu?
Ungqongqoshe ukuze athenjwe akabeke izibalo zamacala osekuboshwe abantu ngawo, kungabi nje ukukhuluma nje okungenasisekelo kokufuna ukubukwa nodumo emngcwabeni. Sekuphele iminyaka manje abalandeli be-Orlando Pirates, umndeni nomphakathi belindele ukuboshwa kwababulali baSenzo Meyiwa. Yiliphi leli khono noma lo mlingo azowenza ngoba sekubulewe uSindiso Magaqa?
UKhongolose akazilungise yena kuyekwe umhobholo wokulwela amathenda, kusetshenzelwe umphakathi waseNingizimu Afrika njengoba kwakuthembise abaholi abadala.
Uma sekunjalo abantu bazobuyelwa yithemba kubuye namavoti asemlahlekele. Okokugcina mhleli sengathi abaholi baKhongolose lapha KwaZulu-Natal bangaluphatha kahle lolu daba lwesinqumo senkantolo, bakhombise ukuvuthwa bamukele isinqumo senkantolo beyiqembu elibusayo babe yisibonelo emphakathini waseNingizimu Afrika nakwamanye amazwe njengenhlangano endala e-Afrika kwezokulwela inkululeko. OKHATHAZEKILE LAMONTVILLE