UDa Gama usezoqeqesha iqembu eligijima kwiNFD
UMAKADEBONA womqeqeshi odume kwiBafana Bafana nakwiOrlando Pirates u-Owen Da Gama usethole umsebenzi kwiNational First Division (NFD).
Isolezwe lithole ngomthombo walo ongashayi eceleni ukuthi uDa Gama usengumqeqeshi weHighlands Park egijima kwiNFD. UDa Gama usanda kuhlukana neSouth African Football Association (Safa). KwiSafa ubecija iqembu lesizwe lika-Under 23 aphinde abe yiphini lomqeqeshi weqembu lesizwe.
“UDa Gama uqede yonke into neHighlands Park izolo (ngeSonto). Namuhla uzoqala umsebenzi. Leli qembu limnike itshe lemali amanye amaqembu adlala kwi-Absa Premiership abengeke amnike yona,” kusho umthombo.
IHighlands igawulwe yizembe kwiPremiership ngesizini edlule. NgoMgqibelo idliwe yiMbombela United ngo 1-0 ekuhambeni. Ngemuva kwemidlalo emihlanu leli qembu lisaqoqe amaphuzu ayisithupha.
UDa Gama ubefunwa nayiRoyal Eagles. Iqembu lesizwe likaUnder 23 ulifake kuma-Olympic Games ngemuva kweminyaka engu-16 lagcina ukudlala kulo mqhudelwano. Kuthintwa imenenja yakhe, uLwazi Mazibuko, ikuqinisekisile ukuthi uDa Gama usejoyine iHighlands. “Ziyiqiniso impela izindaba zokuthi uDa Gama usejoyine iHighlands. Siqede yonke into izolo (ngeSonto). Uqalile namuhla (ngoMsombuluko) ukusebenza. U-Owen unerekhodi elihle lokusebenza nabafana abancane. Lokhu kufakazelwe yimpumelelo yakhe eqenjini lesizwe lika-Under 23. KwiNFD useke wawudla umhlanganiso enyusa iSilver Stars. KwiPremiership usebenze emaqenjini amakhulu waphinde wayibamba naseqenjini lesizwe. IHighlands ifuna ukubuyela esigabeni esikhulu futhi umuntu onesipiliyoni njengoDa Gama angayisiza,” kusho uMazibuko.
IHighlands igcine inqwaba yabadlali egawulwe nabo yizembe. Leli qembu liqale kahle kodwa labuye lalahlekelwa ngumgqigqo.
Ethintwa uDa Gama ngomsebenzi wakhe omusha uthe ujabule kakhulu. “IHighlands yiqembu elinezinjongo ezinhle. Bangabantu abaphokophele phambili. Nami ngiwuhlobo lomuntu ohlale ephokophele phambili. Ngizimisele ngokwenza konke okusemandleni ami ukuthi ngifeze iphupho lezikhulu zeqembu ezifuna ukubuyela esigabeni esikhulu.
“Ngiyazi ukuthi ngeke kube lula kodwa angingabazi ukuthi iqembu esinalo liqine ngokwanele. Asikho isikhathi ngakho kumele siqale siqoqe amaphuzu. Okuhle wukuthi kunekhefu lemidlalo yeFifa ngemuva kwemidlalo yangempelasonto okuzonginika isikhathi sokujwayelana neqembu lami,” kusho Da Gama.
Isolezwe liphinde lahabula izindaba zokuthi iMbombela United ixoxa no-Allan Freese, ochithwe yi-Eagles, ukuthi azoqeqesha kuleli qembu.