Usekhona ozoqeqesha iBanyana Banyana
YIZE uDesiree Ellis ezifake emlandweni wokuba owokuqala kuleli ukunqoba igolide kwiCosafa Cup njengomdlali, wakuphinda njengomqeqeshi kodwa lokhu akusho ukuthi kuzosiza ekubeni yisigxivizo ekutheni athathe umsebenzi wokupheka iBanyana Banyana ngokugcwele.
Iqembu lesizwe labesifazane linqobe indebe yalo yesine yeCosafa Cup liguqisa osokhaya iZimbabwe ngo 2-1 kowamanqamu eBarboufield Stadium, KwaBulawayo, ngeSonto ntambama.
U-Ellis owanqoba lo mqhudelwano okokuqala engumdlali ngo-2002, uyena obambe izintambo zokuqeqesha kusukela kwashiya abeyiphini lakhe uVera Pauw ngemuva kwama-Olympic nyakenye.
Okhulumela inhlangano eyengamele ibhola iSafa, uDominic Chimhavi, ukugcizelele ukuthi usekhona umqeqeshi.
Leli phephandaba like labika ukuthi kuvela ukuthi kuzoqashwa umqeqeshi wangaphandle okhonjwa e-Italy. UPauw yena wayeqhamuka eNetherlands.
Ngaphambi kukaPauw umsebenzi wawenziwa nguJoseph Mkhonza owaba owokuqala ukufaka iqembu kuma-Olympic, eLondon ngo-2012. “UDesiree uzoqhubeka nokuba yingxenye yeBanyana noma ngabe ukuyiphi indawo anikwa yona. Naye uyakwazi lokho futhi ugculisekile ngakho njengoba wayekhona ngesikhathi kubhekwa umqeqeshi. Uhlelo lokubheka umqeqeshi omusha kade lwaqala futhi kade lwaphothulwa sekusele ukuthi sazise abazindaba,” kusho uDominic. Uthe u-Ellis ubebanga nabantu abathathu, angafunanga ukusho ukuthi ngabe abangaphandle noma abakuleli.
IBanyana iye kulo mqhudelwano kade yagcina ukudlala ngoJanuwari lapho yayinomdlalo wobungani neFrance. Ngemuva kwalokho iSafa ayizange iyitholele eminye imidlalo yobungani.
Ukugqoza kwemidlalo yobungani ngezinye zezinto umqeqeshi ozofika okuzomele abhekane nazo kodwa kube kubhekwe ukuthi afake iqembu emiqhudelwaneni emikhulu iNdebe yoMhlaba ka-2019.
Esitatimendeni seSafa ngemuva komdlalo, u-Ellis uthe ukuba ngumpetha kabili ubengakucabangi.
“Seside kakhulu isikhathi (anqoba ngo-2002) kodwa ngizizwa ngikhethekile. Ngijabule kodwa kufanele kubongwe abadlali ngokusebenza kwabo kanzima,” kusho u-Ellis.
Abanye ethimbeni leBanyana abathole amagolide abo esibili kulo mqhudelwano, uNoko Matlou, Nothando Vilakazi noChantelle Essau ababekhona iqembu ligcina ukuphakamisa le ndebe ngo-2008.