Amathiphu ezempilo ezimeni ezinzima
ULWAZI oluncane lwezempilo lungenza umehluko ekutheni kusizakale umuntu onesifo esibucayi kusalindwe abezimo eziphuthumayo noma ngaphambi kokuthi aphuthunyiswe esibhedlela.
Abakwa-ER24 bakhiphe amacebo ezempilo ongawasebenzisa ukusiza umuntu oqulekile noma ebindwa.
Nakhu ongakwenza ukusiza umuntu uma equleka: Zama ukumvikela ukuthi angashayeki ngesikhathi ewa. Mlalise ngecala phansi noma embhedeni. Kungenzeka avuke emuva kwemizuzwana. Uma kubukeka sengathi akaqulekile lokhu okujwayelekile noma kusengathi ugula kakhulu, shayela i-ambulensi. Ukuthinta abakwa-ER24 ungashayela ku-084 124.
Uma ushiswe yisitofu kumele yini uye isibhedlela: Kubalulekile ukuthi uthole usizo oluphuthumayo. Faka isandla sakho emanzini ahlanzekile abandayo, imizuzu engu-15 kuya kwengu-20 noma ungaboni sibazi. Lokhu kuzokwenza ukuthi kugwemeke ezinye izinkinga ezingenzeka ngaphansi kwesikhumba. Uma unezibazi zokusha futhi usezinhlungwini ezingabekezeleleki kumele ucabange ukuya kudokotela. Ungawusebenzisi u-ayisi noma yini ewu-ayisi ngoba kwenza umonakalo esikhumbeni.
Ungamsiza kanjani umuntu ohilekile : Uma ekhwehlela noma esakwazi ukukhuluma, mnike ithuba lokuthi ehlise umoya. Uma inkinga yokukhwehlela iqhubeka, myise kudokotela oseduzane. Uma engakwazi ukukhuluma ngoba evaleke umoya noma ekhombisa izimpawu zokuhileka (ebeke izandla emqaleni) kumele wenze uhlelo olwaziwa ngeHeimlich Maneuver noma umshaye emhlane uma kuyingane. Lolu hlelo lusetshenziswa uma kunikwa abantu usizo oluphuthumayo. Kubalulekile ukuthi ulufundele kuqala ngaphambi kokuthi ulusebenzise.
Uma uzisikile uya nini kofuna usizo lwezempilo: Ukusikeka noma kukuncane kangakanani kungagcina sekubucayi uma isilonda singenwa amagciwane. Kubalulekile ukusihlanza isilonda usebenzise amanzi. Uma sivulekile noma singayeki ukopha ngisho emuva kwemizuzu emithathu sicindezeliwe kubalulekile ukuthola usizo lwezempilo. Qaphela kakhulu ezibazini ezisebusweni ngoba zingenza kube noshintsho olungephinde lulungiseke nokusikeka eduze kwemithambo nemisipha ngoba kungenzeka ukuthi kukhona umonakalo obucayi owenzekile.
Uma ingane iphuze uphoyizeni: Ehlisa umoya bese ushayela ulayini obhekele ukweluleka ngophoyizeni esibhedlela sezingane iRed Cross. Bathinte ngokushesha ku-021 689 5227. Ungazami ukwenza ingane iphalaze noma uyiphuzise okuthile ngaphambi kokuxhumana nabasebenzi bezempilo. Iyise kudokotela.