Indlela yokugwema esenhliziyo
UKUCHITHA imizuzu engu-30 osukwini wenza umsebenzi wasendlini noma uhamba ngezinyawo kungasiza ukuvikela isifo senhliziyo, kukuvikele nasekufeni.
Ucwaningo oluphume ku-The Lancet lukhombisa ukuthi ukunyakazisa umzimba kungasiza ukugwema isiqubu esisodwa sokuhlaselwa yisifo senhliziyo, kuphinde kugweme isehlo esisodwa sokufa kwezingu-12. Ngokusho kocwaningo, akudingi ukuthi umuntu aze azivocavoce nsuku zonke noma achithe amahora amaningi ejimini.
Ukwenza imisebenzi yasendlini, ukuhamba imizuzu engu-30 nje ezinsukwini ezinhlanu esontweni kwanele ekuvikeleni ingozi yokuba nesifo senhliziyo nokushona singakafiki isikhathi. NgoLwesihlanu kugujwa usuku lokunakekela inhliziyo, World Heart Day.
Emhlabeni wonkana balinganiselwa ku-70% abantu abashona ngenxa yezifo ezihlobene nenhliziyo, kuvamise kakhulu emazweni asathuthuka. Balinganiselwa ku-17.5 million abantu abashona ngenxa yesifo senhliziyo nesohlangothi unyaka nonyaka emhlabeni. Izibalo zaseNingizimu Afrika zikhombisa ukuthi babalelwa ku-14% abantu bakuleli abaneminyaka ephakathi kwengu-30 kuya kwengu-70 abashona ngenxa yezinkinga zenhliziyo.
Lolu cwaningo lubheke abantu abalinganiselwa ku-13 000, abaneminyaka ephakathi kwengu-35 no-70, basemazweni angu-17.
Luveze ukuthi ukuchitha imizuzu engu-150 unyakazisa umzimba kuhlobene nokunciphisa amathuba okufa nokuhlaselwa isifo senhliziyo.
Ukwandisa lesi sikhathi ngokuzivocavoca noma ukunyakazisa umzimba imizuzu ibe ngu-750 ngesonto kuba nomthelela omkhulu kunalo.
Ngaphandle kokuvikela isifo senhliziyo ukukhuthalela ukunyakazisa umzimba kusiza ekugwemeni ezinye izifo okubalwa kuzo esohlangothi, umfutho ophezulu wegazi nezinye.
Inhlangano yezempilo emhlabeni wonke, iWorld Health Organisation (WHO) ikhuthaza abantu abaneminyaka ephakathi kwengu-18 kuya kwengu-64 ukuthi basebenzise imizuzu engu-150 benyakazisa umzimba ngokuzivocavoca ngesonto. Loku kusho nokuzivocavoca ngezindlela zokwakha amamasela. Ngokwale nhlangano bancane kakhulu abantu (23%) abaphumelela ukwenza lokho.
UDkt Scott Lear wesikhungo semfundo ephakeme, iSimon Fraser University nongomunye wabacwaningi abahamba phambili kulolu cwaningo uthe ukumelana nemigomo ebekwe yi-WHO akudingi ukuthi abantu baze bazitshele ukuthi kufanele baye ejimini.
“Ukuhamba imizuzu engu-30 kwenza omkhulu umehluko – ukwenza okungaphezu kwalokhu kuba nomthelela ongaphezulu futhi kunciphisa kakhulu amathuba okuba sengozini (yezifo),” kuchaza uDkt Lear.
Uthe kubalulekile ukuthi abantu bagxile ekuvikeleni ukungenwa yizifo okubalwa kuzo esenhliziyo, ikakhulu njengoba kunzima ukumelana nemigomo okumele ilandelwe uma umuntu esenalesi sifo nezinye ezifana naso.
Uthe isifo senhliziyo siyaphoqa ukuthi kube nemigomo elandelwa umuntu ukuze aphile isikhathi eside – kulena kubalwa ukuthatha imishanguzo, ukuqikelela ukudla, ukudla okunempilo ngaso sonke isikhathi – okuyinto engelula kwabanye. Kwabanye kunzima nokuthola imali yokuqinisekisa ukuthi badla ngendlela efanele.
“Ukunyakazisa umzimba kuyindlela eshibhile yokuvikela isifo senhliziyo. Ucwaningo lwethu lukhombisa ngokusobala ukuthi ukugqugquzela abantu ukuthi bajwayele ukunyakazisa umzimba kufanele kufakwe ezinhlelweni zezempilo ezihlose ukulwa nokusabalala kwezifo,” kuqhuba uDkt Lear. Okunye ongakwenza ukuvikela inhliziyo yakho:
Idla ngendlela – Qinisekisa ukuthi udla izithelo nemifino usuku nosuku. Qala usuku ngokudla isidlo sasekuseni naso sibe nezithelo.
Sebenzisa imizuzu engu-30 osukwini lakho ukunyakazisa umzimba ngokuzivocavoca, ukuhamba noma ukwenza umsebenzi wasendlini nokunye.
Jwayela izitebhisi, ugweme ukusebenzisa ikheshi
Lala ngokwanele. Ukulala ngendlela efanele kubalulekile ukuze uthole isikhathi sokuphumula. Amahora ayisishiyagalombili kungaba yisikhathi esenele ongasilala ukuze uqinisekise ukuthi uba sesimeni esihle sempilo.