Utholwe esesokeni obenyamalele
UTHOLAKALE eqhethe nesoka owesifazane waKwaDlangezwa osekuphele izinyanga ezintathu efunwa emuva kokuba kwavulwa icala lokunyamalala kwakhe emaphoyiseni.
UNksz Mbali Gumede (22) owayesanda kuthweswa iziqu e-University of Zululand, Ongoye ngesikhathi enyamalala ngoJuni 5, utholakale eSoweto, eGoli. Kuthiwa uphenyo lwamaphoyisa luwaholele eGoli lapho eficwe khona nesoka lakhe.
Okhulumela amaphoyisa KwaZulu-Natal, uColonel Thembeka Mbhele, uthe akekho ozoboshwa okwamanje ngoba uNksz Gumede ubengathunjiwe.
“Ngesikhathi enyamalele umndeni wakhe wavula icala lokulahleka komuntu. Kwabuye kwavela amahlebezi okuthi umzala wakhe uthe useNigeria, wathunjwa khona,” kuchaza uColonel Mbhele.
Uthe uNksz Gumede usehlanganiswe nomndeni wakhe idokodo ladluliselwa kumshushisi okunguye othe ngeke kushushiswe muntu.
“Kuye kudingeke ubufakazi bokuthi umuntu ubethunjiwe ngempela ukuze kushushiswe umuntu. Kulokhu bekungamahlebezi nje ukuthi uNksz Gumede wathunjwa,” kusho uColonel Mbhele.
UMkhuzi wamaPhoyisa obambile esifundazweni, uMajor General Bheki Langa, uthe kuzophenywa ukuthi owesifazane akawudukisanga yini umndeni namaphoyisa ngokunyamalala kwakhe.
“Sikuthathela phezulu ukunyamalala komuntu kwenziwe nophenyo olunzulu. Uma owesifazane eqambe amanga kumele athathelwe izinyathelo. Siyawunxusa umphakathi ukuthi uyeke ukufafaza amanga ngokunyamalala kodwa uma umuntu ezohamba abike kubo. Kumele babhekane nomthetho abaqamba amanga ngoba kusetshenziswa impahla kahulumeni nemali befunwa,” kusho uLanga.
UNksz Tobo Mthembu ongudadewabo kaNksz Gumede utshele iphephandaba ukuthi akakayitholi imininingwane egcwele ngalolu daba.
“Angikasitholi isikhathi sokuya ekhaya ngizwe kahle ngokutholakala kwakhe. Ngizwile kodwa ukuthi usetholakele,” kusho uNksz Mthembu.
Ebuzwa ngemibiko eke yasabalala yokuthi bese ekhonjwa eNigeria, uNksz Mthembu unqabile ukuphawula.
UNksz Mthembu nguye obelokhu ekhuluma nabezindaba ngokunyamalala kukadadewabo. Kuthiwa uNksz Gumede wanyamalala eyolungisa izinto zesikole Ongoye. Wayesanda kuphothula izifundo zeCorrectional Studies Ongoye esalungiselela ukuyofuna umsebenzi.