Isiteleka singathikameza amaposi
KUNGASE kuphazamiseke ukusebenza kwamaposi eNingizimu Afrika emuva kokuthi inyunyana yabo iCommunication Workers Union (CWU) imemezele ukuthi siyaqala isiteleka sayo namhlanje esizothinta abasebenzi beposi, abakwaSentech nabakwaBroadband Infranco kuzwelonke.
Esitatimendeni esithunyelwe abezindaba, uNobhala Jikelele we-CWU uMnuz Aubrey Tshabalala uthe konke kumi ngomumo ngesiteleka sanamhlanje futhi nakusasa bazobe beseka iCosatu esitelekeni sikazwelonke.
Phakathi kwezikhalo zabasebenzi uTshabalala ubalule amaholo, ukunganikezwa kweposi ilayisensi yokuba yibhange nezinsolo zokuthi kungase kusetshenziswe imali yempesheni yabasebenzi bahulumeni ukutakula izinkampani ezingenzi kahle.
UMnuz Mark Barnes oyisikhulu esiphezulu saseposini uvumile ukuthi isiteleka singase siphazamise eposini kodwa banazo izinhlelo zokuqinisekisa ukuthi amaposi awavalwa yize kunesiteleka kuzwelonke.
Uthe banikwe incwadi ebazisa ngesiteleka ngoLwesithathu kodwa benza konke okusemandleni ukuqinisekisa ukuthi iposi lisebenza kahle.
“Ngonyaka odlule sithole uxhaso ukuze sikhokhele abantu esibakweletayo, silungise nodaba lwamaholo. Okwamanje isimo sihle phakathi kwethu nabasebenzi. Imali esixhaswe ngayo ayinkulu, okusho ukuthi asikwazi ukunyusa amaholo noma yikanjani kodwa sizibophezele ekuxoxisaneni nabasebenzi,” kusho uBarnes.
Selokhu kwangena uBarnes esikhundleni esiphezulu sekunozinzo eposini kwazise eminyakeni edlule bekunezikhalo zokuthi liyawa futhi abasebenzi bekhala ngokunganyuselwa amaholo.
UBarnes uthembise umphakathi ukuthi amaposi azovulwa ukuze uthole usizo oludingayo.
Khona manjalo, uNobhala Jikelele weCosatu KwaZulu-Natal, uMnuz Edwin Mkhize, uthe lizoma nse iTheku ngoLwesithathu uma sekuteleka abasebenzi abangayifuni inkohlakalo, ukudilizwa nokusetshenziswa busululu kombuso yidlanzana.
UMkhize uthe kusukela ngo-9 ekuseni kusasa, iTheku lizoma ngoba abasebenzi bazoqala imashi kusukela epaki yeSilo uDinizulu noPW Botha behle njalo ngomgwaqo uDkt Pixley kaSeme (West Street) baze bayoma eCity Hall lapho bezodlulisela khona uhlu lwabo lwezikhalo.
Uthe ziningi izinyunyanya ezizobamba iqhaza esitelekeni, abale kuzo eyothisha iSadtu, eyonesi iDenosa, eyabasebenzi bamajele namaphoyisa iPopcru nezinye.
Uphethe ngokugqugquzela abasebenzi ukuthi bangalali ngoLwesithathu kodwa bavuke bayomasha ukuze uhulumeni ezoshintsha ukwenza ngodaba lokusetshenziswa kombuso yidlanzala, ukuphela kwemisebenzi nenkohlakalo edla lubi ezweni.