UPitso ukhale ngowasekhaya

UMQEQESHI weMamelodi Sundowns uPitso “Jingles” Mosimane ususane nezintatheli ngemuva komdlalo we-quarterfinal yeCAF Champions League.

ISundowns idliwe yiWydad Casablanca ngo 3-2 sekukhahlelwa amaphenathi kowomlenze wesibili eMorocco ngoMgqibelo.

Umdlalo uphele ngo 1-0 okuphoqe ukuthi ziye kumaphenathi kwazise emlenzeni wokuqala iSundowns inqobe ngo 1-0. Ngemuva komdlalo uMosimane ususane nezintatheli zaseMorocco esithangamini nabezindaba.

Izintatheli zaseMorocco ubuzizwa ukuthi zijabule ngomphumela okuyinto ecasule uMosimane.

“Ngesiwombe sesibili siyifake ingcindezi iWydad futhi asizange sikhombise nakancane izimpawu zokuthi siyayesaba. Sidlale kahle ngoba besingenazo izinhloso zokuhlala emuva. Sibonile ukuthi bayayizwa ingcindezi yingakho besesidlalela ngakubona.

“Bebeliqumuza ibhola. Kumele ngibancome ngoba ngesiwombe sokuqala bakhombisile ukuthi bafuna ukuwina. Ngesiwombe sesibili sibuyile ngamandla. Ngebhadi ke amaphenathi angawinwa yinoma ngubani futhi ngiyayibongela iWydad. Umdlalo siwulahle ePitoli hhayi lapha (eMorocco). Unompempe wajaja ama-offside amathathu angekho. Nonke nabona angithi,” kusho uMosimane.

Ngemuva kwalokho kungenele owesifazane oyintatheli ekhuluma ngolimi lwakhe waphendulwa ngutolika ngalwakubo (isi-Arab). Inkulumo yabo ibiphelezelwa uhleko.

“Ngabe nisho izinto ezingasile? Kungani bekhuluma?” kubuza uMosimane. Utolika uphendula uMosimane wathi bakhuluma ngezinqumo zikanompempe abekade echaza ngazo.

“Yebo kunjalo. Umsizi kanompempe wajaja i-offside kathathu sibhekene nonozinti. Amagoli ahamba lapho. Ngabe sishaye amagoli amathathu njengoba senza ngonyaka odluke (kwiZamalek emdlalweni womlenze wokuqala wamanqamu weChampions League). Sisamukele isimo futhi siyayibongela iWydad. Kungcono ngoba sinikhombisile ukuthi sifuna ukudlala,” kusho uMosimane.

“Ngiyazisola ngomdlalo wasePitoli. Ngidumele, akuyona into enhle ebholeni. Sabanjelwa kathathu ekhaya kuthiwa ama-offside ekubeni kwakungewona,” kuchaza uMosimane.

Owesifazane oyintatheli ube esebhidilisha isiNgisi watshela uMosimane ukuthi ama-offside amathathu awasho ukuthi uzoshaya amagoli amathathu.

“Batshele ukuthi uthini,” kusho uMosimane etshela utolika ukuthi akatshele ezinye izintatheli ngolimi lwazo ukuthi lo wesifazane uthini.

Nangempela utolika wenze njalo kodwa le ntatheli yesifazane yangenelela esakhuluma isikhuluma ngolimi lwayo. Kulobo bumnyama uMosimane naye ungenelelile: “Wayekele ubone ukuthi kuzokwenzekani (kusho uMosimane echaza ngokuthi unompempe kwakumele ayeke umdlalo uqhubeke abone ukuthi kuzokwenzekani kunokuthi ajaje ama-offside angekho). Mtshele (uMosimane eyalela utolika ukuthi achazele intokazi ngolimi lwayo).

Uma sihluleka ke wukushaya amagoli sasingasho ukuthi uqinisile (ukuthi ama-offside amathathu awasho ukuthi uzoshaya amagoli amathathu). Uyezwa medemu?”