Olingisa kwiS’thunzi uqokwe kuma-Emmy
UMLINGISI osezakhele olukhulu ugazi kubalandeli bomdlalo okhonjiswa kuMzansi Magic, Is’thunzi, uhluleke ukuzibamba ethola izindaba zokuqokwa kwakhe emncintiswaneni wezindondo zaphesheya. Ngesikhathi ezwa lezi zindaba ezimnandi uThuso Mbedu uvele wadansa, wamemeza, wakhala, wagxumagxuma kwaba sengathi akazi nokuthi enzeni.
Le ntokazi iqokwe emcimbini omkhulu wezindondo phesheya kwezilwandle, ama-Emmy Awards.
UThuso uqokwe emkhakheni wowesifazane ohamba phambili ekulingiseni emidlalweni yethelevishini emhlabeni.
Kulo mkhakha uqokwe nomlingisi waseBrazil u-Adriana Esteves, Anna Friel noSonja Gerhardt.
Uthe ukuqokwa kulo mcimbi kusho lukhulu futhi uzizwa ethobekile ngezinto ezinhle ezimlandelayo.
Le ntokazi iqokwe kulo mcimbi ngokulingisa indawo kaWinnie.
“Ngiyabonga kubantu bakuleli abakhombise ukungijabulela ngesikhathi ngifika ekulingiseni kuze kube manje. Lezi zindaba ngizithola manje. Ngilapha engikhona ngomusa kaNkulunkulu,” kubhala uThuso ku-Instagram.
Uqhube wathi uyahluleka ukukhuluma kakhulu kodwa uyabona amaphupho akhe ayafezeka.
“Udadewethu ubambe elikhulu iqhaza empilweni yami, ngisho emkhakheni wokulingisa ubengeseka,” kuchaza le ntokazi.
UThuso ubonge nenkampani asebenzisana nayo ukumtholela imidlalo okumele alingise kuyona.
“Bangithatha, bakholelwa kimi ekubeni ezinye izinkampani sezingichithile. Ngiyazi uNkulunkulu uzobabusisa ngokufeza iphupho lami,” kuchaza yena.
Imizamo yokuthola uThuso ayiphumelelanga njengoba ucingo lwakhe belukhala lungabanjwa.
Udadewabo uNoma Mbedu uthe, lo mlingisi ujabule ngokuzwa lezi zindaba.
UThuso kuvela ukuthi uthole lezi zindaba izolo ekuseni ngemuva kokuthi inkanka yomlingisi, uThembi Mtshali-Jones emhalalisele kuTwitter.
Usomahlaya uTrevor Noah naye usanda kuzuza indondo kuma-Emmy emasontweni adlule.