E-FNB bayayishintsha indlela yokubhanga
KUBUKEKA sengathi eminyakeni ezayo abantu bazosebenzisa amaselula namakhompyutha ukubhanga emuva kokuvela kwezindaba zokuthi bangu-120 million abantu abavakashela amagatsha ebhange lakwa-FNB uma kuqhathaniswa no-10 billion wabantu abasebenzisa ubuchwepheshe besimanje ukulondoloza imali.
Izibalo ngezabantu abasebenzisa amagatsha akwaFNB e-Afrika namaphethelo.
UMnuz Christoph Nieuwoudt, wakwa-FNB, uthe ukubona amakhasimende abo esebenzisa ubuchwepheshe besimanje ukubhanga kwenze basungula amaselula abo abaqale ukuwadayisa ngonyaka odlule.
“Abantu babhanga kumaselula, bathenga ugesi wekhadi, amaairtime baphinde bakhokhele izikweletu zabo,” kusho uNieuwoudt.
Uthe balalela lokho okudingwa ngamakhasimende yingakho sebegxile ekwenzeni ubuchwepheshe besimanje ngoba abantu abaningi abathandi ukuma kolayini abade.
Ebuzwa ukuthi ngabe ubuchwepheshe besimanje buzoqeda imisebenzi yabantu abasebenza emagatsheni akwaFNB, uNieuwoudt uthe ngeke badilize abantu kodwa baqeqesha kabusha abasebenzi babo ukuze bakwazi ukubhekelela izidingo zamakhasimende zobuchwepheshe.
“Amagatsha ngeke siwaqede ngoba amakhasimende anezidingo ezehlukene. Akekho umsebenzi esimdilizayo kunalokho sibaqeqesha Durban Durban kabusha ukuze uma abantu bedinga ulwazi olubanzi ngeapp yethu basizakale,” kusho uNieuwoudt.
UMnuz Shadrack Palmer, ongumphathi wohlelo lwamaselula lakwaFNB, uthe amakhasimende abo asezoba namaselula anobuchwepheshe obuthuthukile be-Android, LTE nobunye uma bethenga amaselula abizwa ngeConeXis X2 ne-A2.
Uthe ukuze uthenge eyodwa yalamaselula kufanele ube no-R1 500 owulondoloza njalo ngenyanga kwa-FNB uma ufuna i-ConeXis X2 ngoba ikhokhelwa u-R199 ngenyanga.
Uma ufuna iConeXis A2 udinga ukulondoloza u-R500 njalo ngenyanga, ikhokhelwa u-R69 ngenyanga. Amaselula azotholakala kuwo wonke amagatsha akwa-FNB kusukela ngoOkthoba 2, abantu bayakwazi nokuwathenga besebenzisa i-internet banking/ cellphone banking.
Uthe i-data ngeke imbe eqolo ngoba vele abantu ababhanga kwa-FNB basebenzisa i-app yakhona ukuthenga ugesi nokunye abakudingayo mahhala.
Uveze ukuthi sebedayise amaselula acishe afinyelele ku-76 000 akwa-FNB kanti lokhu kukhombisa ngokusobala ukuthi abantu badinga amaselula ashibhile.
UMnuz Len Pienaar, oyisikhulu esiphezulu sakwaFNB Connect, ugqugquzele abantu ukuthi basebenzise ubuchwepheshe bamanje ngoba benza impilo ibe lula. Wenze isibonelo sokuthi uma kuphela ugesi ngo-8 ebusuku kusuke sekuvaliwe ezitolo kodwa uma une-app yakwa-FNB kwiselula yakho uyakwazi ukuwuthenga ungahlali ebumnyameni.