Kusakhishwa izisu kwezingaphephile
ZILINGANISELWA ku-25.5 million izehlakalo zokukhishwa kwezisu ezingaphephile ezenzeka emhlabeni wonke unyaka nonyaka.
Umbiko ophume kwiThe Lancet uveza ukuthi uhhafu wezehlakalo zokukhishwa kwezisu emhlabeni wenziwa ezindaweni ezingaphephile.
Ezingu-24 million zenzeka e-Afrika, Asia, naseLatin America.
Le miphumela iphume ocwaningweni lwenhlangano yezempilo iWorld Health Organisation (WHO) neGuttmacher Institute.
Ucwaningo luthole ukuthi ukukhishwa kwezisu emazweni adla izambane likapondo bekwenziwa ngendlela ephephile. UDkt Bela Ganatra, ongomunye wabacwaningi, uthe amazwe abenemithetho evumela ukuthi izisu zikhishwe ezikhungweni ezigunyaziwe. Uthe emazweni anemithetho eqinile nengakuvumeli ukukhishwa kwezisu okusemthethweni beliphezulu izinga lokukhishwa kwezisu ngokungaphephile.
“Ukukhishwa kwezisu okuphephile bekwenzeka emazweni angenayo imithetho evimbela ukukhishwa kwezisu okusemthethweni, isimo esihle sezomnotho nezinhlelo zezempilo ezisezingeni elifanele,” kusho uDkt Ganatra.
INingizimu Afrika isemazweni akuvumelayo ukuthi abesifazane bakhiphe izisu ngokusemthethweni. Noma kunjalo ziphezulu izibalo zabesifazane abasebenzisa izikhungo ezihushula izisu ngokungemthetho. Umbiko okhishwe ekuqaleni kwalo nyaka uveze ngokusobala ukuthi ukubakhona kwezikhungo ezihushula izisu ngokusemthethweni akwenele ukuxazulula inkinga yokushona kwabesifazane ngenxa yokusebenzisa izikhungo ezingekho emthethweni.
Umbiko ukhishwe ngongoti bezempilo base-University of Cape Town nenhlangano elwela amalungelo abantu i-Amnesty International.
Ngokwezibalo zezempilo KwaZuluNatal, balinganiselwa ku-12 031 abesifazane abalaliswe esibhedlela ngenxa yezinkinga ezidalwe wukukhipha izisu ngokungemthetho phakathi kuka-2015 no-2016. Abangu-1 455 babe nenkinga yesibeletho ngenxa yokuzama ukuhushula izisu ngokungemthetho. Umbiko wakuleli weSaving Mothers wango-2012 uveze ukuthi abesifazane abangu-186 baphuphunyelwe yizisu konakala nezibeletho ezikhungweni zikahulumeni.