Ezokufukula umnotho eKZN
UTHEMBISA izinhlelo eziningi ezizofukula umnotho KwaZulu-Natal uNgqongqoshe wezokuThuthukiswa koMnotho uMnuz Sihle Zikalala. Ukusho lokhu izolo ekhuluma nosomabhizinisi kwi-Essence Festival.
UZikalala uthe kuyakhathaza ukuthi akukalinganwa ngokomnotho osaphethwe abamhlophe.
“Ngo-Okthoba sizokwethula uhlelo olubizwa nge-One Stop Investment Centre, oluzoheha kakhulu abatshali bezimali. Sizimisele ukuthi singaphili ngokufunzwa kuphela kodwa sizikhulisele umnotho. Sesinqume nokuthi singabe sisathenga ezinkampanini ezinkulu ifenisha nemikhiqizo yokuhlanza ukuze sifukule osomabhizinisi abancane,” kusho uZikalala.
UMnuz Vuyo Jayiya oyiProject Manager ophikweni lokuthuthukiswa komnotho kuMasipala weTheku, unxuse osomabhizinisi abancane ukuthi bangazincishi amathuba. Ubanxuse ukuthi basondele ehhovisi labo ngoba ziningi izinhlelo abeza nazo. UJayiya uthe basemkhankasweni wokusungula uhlelo lokuxhumanisa nokubhalisa abalimi abasafufusa esifundazweni.
“Kumele sibe nohla lwabalimi ukuze sibalekelele ukubathuthukisa nokubeseka. Sibheke kakhulu nokusiza abafundi bezolimo asebeqedile ukufunda, ukuze sibacije. Ngeke senze lutho ngaphandle kwezobuchwepheshe yingakho silungisa nohlelo lapho sizoveza zonke izinhlelo kwiInternet,” kusho uJayiya.
Ingqungquthela yosomabhizinisi ivulwe yiMeya yeTheku uNkk Zandile Gumede ngoLwesibili. Iyingxenye ye-Essence Festival ezophutholwa ngeSonto. Namuhla kuzoba nengqungquthela yabesifazane abanamabhizinisi.