Isizotholakala emanyuvesi iTruvada
SELIZOTHOLAKALA ezikhungweni zemfundo ephakeme iphilisi lokuvikela igciwane lengculazi, iTruvada.
Lokhu kusanda kuvezwa abophiko olubhekele izinhlelo zokulwa nokusabalala kwegciwane lengculazi ezikhungweni zemfundo ephakeme, iHigher Education and Training HIV/AIDS Programme (HEAIDS).
Umqondisi we-HEAIDS, uDkt Ramneek Ahluwalia, uthe bazohlinzeka imitholampilo engu-11, ezikhungwneni eziyisikhombisa ngephilisi lokuvikela igciwane lengculazi. Ucwaningi lwakamuva lukhombise ukuthi iTruvada ingakwazi ukuvikela igciwane lengculazi, leli philisi selisetshenziswa ohlelweni lwezempilo lokuvikela olwaziwa nge-Pre-exposure prophylaxis (PrEP).
“Iphilisi lokuvikela igciwane lengculazi sekuwuhlelo olwamukelekile lokuvikela igciwane lengculazi ezikhungweni zemfundo ephakeme zakuleli. Imiphumela yocwaningo olwahlukene oselwenziwe ngaleliphilisi seyikukhombisile ukuthi lingavikela ngo-90% kubantu abasengcupheni kakhulu okubalwa kubo abadayisa ngomzimba, abesilisa abalala nabanye abantu besilisa. Abantu besifazane abasebancane abaneminyaka ephakathi kuka15 no-24 nabo bangabanye balabo abasengcupheni ikakhulu njengoba babuye bazithole beya ocansini nabantu ngoba kukhona abazokuthola – lokhu kubenza abantu abafanele ukuthola le mishanguzo,” kusho uDkt Ahluwalia.
Uthe uphiko lwabo luzosebenzisana noMnyango wezeMpilo ukuhlinzeka leli philisi emanyuvesi. Kusuka kuleli sonto leli philisi lizobe selikhona emanyuvesi okubalwa kuwo i-University of Zululand, Nelson Mandela University, Rhodes University, University of Limpopo, University of the Free State, University of Venda, neVaal University of Technology.
Isikhungo sezempilo iCentre for Disease Control singesinye ezikhuthaza ukuthi lihlinzekwe leli philisi ngenxa yokuthi likhombise ithemba ekuvikeleni igciwane lengculazi. Kwabasebenzisa izidakamizwa ezingena egazini ngomjovo, iTruvada yakhombisa ukuthi ingabavikela ngo-70% abantu abasebenzisa lolu hlobo lwezidakamizwa ekutheni bangalitholi igciwane lengculazi.
“IPrEP ingakwazi ukuvikela izinkulungwane zabantu abasha baseNingizimu Afrika kwigciwane lengculazi kodwa lokhu kungenzeka uma isetshenziswa ngendlela, njalo ngokuthembeka. Yingakho sisebenzisana nezikhungo zemfundo ephakeme, uMnyango wezeMpilo nemitholampilo ukuqinisekisa ukuthi abafundi bathola lonke ulwazi olwenele ngokuthi iPrEP isebenza kanjani nokuthi yini edingekayo ukuze isebenze ngokufanelekile,” kusho uDkt Ahluwalia.
Uqhube wathi kubalulekile ukuthi abafundi basebenzise izindlela ezahlukene zokuvikela igciwane lengculazi okubalwa kuzo namakhondomu. Uthe iPrEP ayivikeli igciwane lengculazi ngo100% - ayilona iphilisi elinomlingo.
“Njengemishanguzo esetshenziswa ukuthithibalisa igciwane, ama-antiretrovirals (ARVs) kufanele leli philisi lisetshenziswe njalo ukuze lisebenze kanti futhi linezinkinga eliza nazo. Sizosebenzisa iTruvada ohlelweni lwethu lwe-PrEP.”
Imiphumela yocwaningo oselwenziwe ngaleli philisi ikhombisa ukuthi lingadala izinkinga okubalwa kuzo ukucikizela kwenhliziyo, ukukhathala nokunye.
Iphinde yaveza ukuthi abesilisa abalala nabanye abantu besilisa ababethatha ngendlela iTruvada babesethubeni eliphidiwe lokungalitholi gciwane lengculazi.
Khonamanjalo inhlangano ehlinzeka usizo lwezempilo, iRight to Care izohlinzeka abantu besilisa abaya ocansini nabanye abantu besilisa ngemishanguzo yokuvikela igciwane lengculazi. Lolu hlelo luzoba ezindaweni ezikhethekile eGauteng naseWestern Cape.