Bancome umsebenzi weziboshwa
UMSEBENZI wezandla owenziwe yiziboshwa zaseQalakabusha, eMpangeni, ihlabe umxhwele abantu abaningi abebehambele eSanlam Centre yakule ndawo. Kusukela ngesonto eledlule eSanlam Centre, yaseMpangeni bekukhonjiswa ngemisebenzi yezandla eyenziwe yiziboshwa zaseQalakabusha.
Imisebenzi yezandla yeziboshwa izokhonjiswa kuze kube nguMgqibelo.
Phakathi kwemisebenzi ekhonjiswayo yizilwane ezibaziwe ezaziwa ngeBig 5, (indlovu, ibhubesi, isilo ubhejane nenyathi) amaqhugwane, indlu yesimanje nobuhlalu.
Ngokusho kukaNksz Lindiwe Dube oqondene nezokumaketha iSanlam Centre, balande imisebenzi yezandla yeziboshwa ukuzokhombisa umphakathi imisebenzi owenziwa kuleli jele.
“Siyithathe ngoba kuyinyanga yamasiko. Abantu abaningi bayithakasele kakhulu imisebenzi yezandla yeziboshwa. Abanye bebefuna ngisho ukuyithenga kodwa bebengeke bakwazi ngoba akuvumelekile ukuthi idayiswe. Ngemuva kombukiso izophindiselwa emuva eQalakabusha. Lokhu kukhombisa ukuthi iziboshwa zinekhono elimangalisayo. Kuyakhombisa ukuthi uma seziphuma ezinye zizobe sezinakho ezizokwenza,” kusho uNksz Dube.
Uqhube wathi abanye abahlabeke umxhwele yimisebenzi yeziboshwa, bebemangala uma bezwa ukuthi imibukiso eyeziboshwa.
UNksz Dube uthe eminyakeni eyedlule, bebesebenzisa imibukiso yabanye abantu kodwa kulokhu banqume ukulanda eyeziboshwa.
UNksz Dube ubonge ukubambisana phakathi kwakhe noMnuz Vusi Luthuli oyimenenja eMnyangweni wezeMfundo okuyiyona efundisa eQalakabusha noMnuz Bongani Dubazana oqondene nezemidlalo, ezokungcebeleka, amaciko namasiko.