Kutuswa iphilisi elishibhile lama-ARV elizofika
INHLANGANO elwela amalungelo abanegciwane lengculazi, iTreatment Action Campaign (TAC) ithi lizosiza iziguli iphilisi lokuthithibalisa igciwane lengculazi eselizosetshenziswa eNingizimu Afrika.
Lokhu kulandela isimemezelo soMnyango wezeMpilo sokushintshwa kwephilisi elilodwa elithathwa abantu abanegciwane lengculazi.
Leli phephandaba libike izolo ukuthi uNgqongqoshe wezeMpilo kuzwelonke uDkt Aaron Motsoaledi uveze ukuthi ngo-Ephreli ngonyaka ozayo sekuzoba nephilisi elishibhile elingcono elizosetshenziswa ohlelweni lokuthithibalisa igciwane lengculazi.
Leli philisi elizobe lithakwe namaAntiretroviral (ARVs) iTenofovir, Lamivudine and Dolutegravir (TLD) kulindeleke ukuthi liqale ukuba khona ngo-Ephreli ngonyaka ozayo.
Leli philisi lizoba nephilisi, iDolutegravir eyaziwa ngokungadali izinkinga eziningi ezigulini eziliphuzayo. IDolutegravir izosetshenziswa esikhundleni se-Efavirenz.
Unobhala weTAC kuzwelonke, uMnuz Anele Yawa uthe bayasamukela isimemezelo soMnyango wezeMpilo sokulethwa kohlelo lokuthithibalisa igciwane lengculazi olungcono olushibhile.
Uthe kuyabajabulisa ukulethwa kweDolutegravir ngoba ayinazo izinkinga eziningi zempilo ezigulini futhi iyalithithibalisa igciwane lengculazi. UYawa uthe leli philisi liphinde lenze kube nzima ukuthi abantu bagcine sebenenkinga yokungazweli kwemishanguzo.
“Ukwenziwa ngcono kwemishanguzo kuzokwenza kube lula ukuthi iziguli zithathe imishanguzo yazo ngendlela. Kuzokwenza singabi bikho isidingo sokuthi iziguli zishintshe amaphilisi eziwaphuzayo ngoba kulindeleke ukuthi sibe sincane isibalo seziguli ezizoba nezinkinga nge-Dolutegravir,” kusho uYawa.
Unxuse uphiko olubhekele ukuphasiswa kwemishanguzo engasetshenziswa kuleli
iSouth African Health Products Regulatory Authority (SAHPRA) ukuthi iphuthumise ukubhalisa eminye imikhiqizo yezinkampani, eyenza amaphilisi ashibhile awuhlobo olufanayo ne-Dolutegravir. Lokhu kuzokwenza lishibhe kakhulu leli philisi.
UMnyango wezeMpilo sewukuvezile ukuthi iNingizimu Afrika izokonga imali elinganiselwa ku-R11 billion eminyakeni eyisithupha ezayo ngokuletha leli philisi elisha.
INingizimu Afrika akuyona kuphela ezosizakala ngokuthola leli philisi ngenani eliphansi kodwa izivumelwano ezenziwe elakuleli nabakhiqizi balo zizosiza namanye amazwe asathuthuka.
UYawa uthe kusafanele inani lala maphilisi liphinde lehle, lokhu kuzokwenzeka ngokuthi izinkampani ezikhiqiza amaphilisi ashibhile zinikwe ithuba lokukhiqiza iphilisi elifanayo.
Uthe banethemba lokuthi ukufakwa kweDolutegravir kuleli philisi elisha kuzokwenza ukuthi kushintshwe namanye amaphilisi asetshenziswa ohlelweni lemishanguzo yokuthithibalisa igciwane lengculazi.