UTira ubonge iDurban Massacre
UDJ Tira usebonge bonke abaculi baseThekwini abebesethimbeni ebelinandisa emcimbini iRed Bull Culture Clash, elikhale lemuka nesicoco salo nyaka.
UTira ubehola abaculi bakulesi sifundazwe akade bezibiza ngeDurban Massacre kulo mcimbi.
Ekhuluma ngokuwina kwabo uTira uthe ukulungiselela lomcimbi bekungelula kodwa bebezimisele bonke.
“Iqembu lika-AKA belingishayisa ngovalo njengoba bebeshaya into ecokeme. Kodwa nokuzethemba kimi bekukukhulu njengoba bengazi ngibophele izinkakha zodwa,” kusho uTira.
Ngesikhathi kumenyezelwa abawinile uTira uthe, akakholwanga.
“Imibono ehlukene ebiqhamuka nabaculi ebesisebenza nabo isebenzile. Imizizu eyishumi ebesinikwe yona ukucula izingoma ezehlukene ibingeminingi kodwa siyisebenzise ngokuhlakanipha,” kuchaza uTira.
UTira udle umhlanganiso esigabeni sokuqala nala kuhlanye khona izihlwele kungena uMgarimbe ecula ingoma yakhe ethi Sister Bertina.
UZodwa Wabantu naye ujatshulelwe abaningi ngesikhathi eshaya imidanso yakhe eyahlukene.
U-Anga noProfessor nabo bashaya into ecokeme kulo mcimbi.
Uhlelo kulo mcimbi beluphethwe uSiyabonga Ngwekazi noThapelo Mokoena.
Kulo mcimbi u-AKA, DJ Tira, Patoranking, Admiral noJahseed bebebhekene nenselelo yokuhlanganisa abaculi abahlukene abazocula kuhlanye izihlwele.