Isililo ngokushona komsunguli weMadlala Brothers
KUPHELILE ngeqembu lombhaqanga eladuma ngeminyaka yo-1970 no-1980, iMadlala Brothers eyayidume ngelikaBhekabantu noThembitshe, kulandela ukudlula emhlabeni komunye wabasunguli nomholi waleli qembu uBhekabantu Madlala (63).
IMadlala Brothers yaduma kakhulu ngamanoni ayethi Ngihlabeleni Imbuz’Emnyama Ngoba Emhlophe Inamabhadi, Hamba Kahle Duduzile, Idlozi namanye.
Ngokusho kwendodana kaBhekabantu, uBongani (20), umufi ushonele kwakhe endlini yokudlela ngoMgqibelo ngezithuba zabo-9 ebusuku. “Wavele wakhala kakhulu. Ngathi uma ngiphuthuma lapho ayekhala khona, ngamfica eseqinile futhi esethule.”
UBongani uthe kumshaqisile kakhulu ukudlula ngesigubhukane kukayise ngoba ubengakaze abike izimpawu zokugula. “Bengimgcine ephethwe yiBP.”
Omunye okhale kakhulu ngokushona kukaBhekabantu ngomunye wezihlabani zomculo wombhaqanga owavundululwa futhi waphekwa nguye kulo mkhakha, uSandile Khwela. Lo mculi uthe ugqemeke engeqiwa ntwala ngoba ukuleli zinga akulo ngenxa yakhe uBhekabantu. “UBhekabantu uyena owangiletha kwiMadlala Brothers ngisewumfana omncane. Ungifundise okuningi emculweni ikakhulukazi ubuchule bokubhala izingoma, nendlela yokusebenzisa isigingci sikamaskandi usenze sibe umgxobanyawo. Ngimazi njengomuntu onomoya ophansi, ongakhulumi kakhulu ohloniphayo.
“Inhloso yakhe enkulu emculweni kwakuwukududuza abadabukileyo ngomculo wakhe nokuthuthukisa indawo yaseMkhomazi. Indawo yaseMkhomazi ikakhulukazi iDududu yaduma kakhulu ngenxa kaBhekabantu noThembitshe. NgiwuSandile ngiyomkhumbula njengobaba, wanginika ithuba emculweni, ubengikhonzile kakhulu futhi ubekholelwa kakhulu kimi, wayehlala ethi ‘wena Sandile imfundo ayikusizanga ngalutho unenhlanhla yokuzalwa nje owayinikwa izimpunga zakini’”, kusho uSandile oseke wahlabana kwaze kwaba kabili ngendondo yeBest Mbhaqanga kumaSatma Awards iminyaka ilandelana.
Owayengumphathi woKhozi FM uWelcome ‘Bhodloza’ Nzimande, uthe indima yomculo wombhaqanga ilahlekelwe kakhulu ngokuhamba kwale ngqalabutho ngoba bebesalindele ukuthi idlulisele ulwazi lwayo kwabanye abaculi abasafufusa.
“Ngizwakalisa okukhulu ukudabuka ngokudlula emhlabeni kukaBhekabantu futhi ngikhalisana nomndeni ngoba uBhekabantu kwakuyiqhawe. Besisafisa ukumbona eluleka abanye abaculi ukuze nabo bagcine sebefinyelele ezingeni lakhe,” kuphetha uNzimande.
UBhekabantu ushiye emhlabeni ingoduso yakhe uNksz Hloniphile Mngadi nezingane zakhe ezintathu uBongani, uKhanyisile (18) noMnqobi (4).
Umufi uzofihlwa emathuneni asekhaya eQiko eMkhunya ngalo Mgqibelo ngemuva kwenkonzo ezokuba kule ndawo ngezithuba zabo9 ekuseni.