Isithandwa sami asiyingeni eyenkonzo yasekamelweni
EZOTHANDO
UMBUZO: Sesinezinyanga eziyisikhombisa sindawonye nesithandwa sami. Sikholelwa kakhulu kuNkulunkulu. Nginomntwana angifice nginaye, naye ngokunjalo unayo ingane. Inkinga wukuthi ubhuti akakaze angithinte noma akhombise ukuthi uyathanda ukuya enkonzweni yasekamelweni. Akakaze akhombise ngisho isasasa uma kuya ezindabeni zocansi. Kona ngiyazi ukuthi uyangithanda futhi akagangile ngoba isikhathi esiningi usichitha nami. Muva nje uma ngimbuza ngalolu daba uthi asilinde size sishade. Angazi ukuthi ngizokwazi yini ukulinda leso sikhathi.
Ayanda, eMgungundlovu Impendulo: Ewu Ayanda uze uthi awazi ukuthi uzokwazi ukulinda pho! Amadoda aziphethe kahle awasaziwa. Kuyinto enhle nencomeka kakhulu leyo. Ningaba nobudlelwano obuqinile nobakhelwe esisekelweni sothando oluqotho ngaphandle kokuthi niye ocansini ngaphambi komshado. Ubudlelwano bothando abuchazwa yikamelo kuphela. Akulula-ke nokuthi singenelele kulolu daba ngoba awuboni ukuthi uzokwazi ukulinda nize nishade. Lokhu kuchaza ukuthi ucansi kuwena luyinto ebaluleke ngendlela yokuthi ungaze weqe umngcele ngoba ubona ungeke ukwazi ukulinda. Lokhu kudinga ukuthi ukunake ngoba kuthinta nendlela ongaziphatha ngayo ngisho senishadile. Isibonelo, uma kungenzeka ukuthi umyeni wakho alimale ebuntwini bakhe ngale ndlela yokuthi akasakwazi ukuya ocansini, ungenzenjani? Umbuzo: Umyeni wami uyindoda ehloniphekile emphakathini nasesontweni kodwa ekhaya ungomunye umuntu. Kunezikhathi la sihlangana naye ngeSonto ekuseni esontweni ngoba engalalanga ekhaya. Lapho kumele ngizenzise ngishaye sengathi konke kuhamba kahle ngenxa yenhlonipho abamnika yona enkonzweni. Angisazi ukuthi kumele ngenzenjani. Engikwaziyo nje wukuthi sengikhathele wukubekezelela umuntu ophila impilo ehlukene.
Igama Ligodliwe, eMlaza Impendulo: Kunabantu abakwaziyo ukuzenzisa uma bephambi kwabanye abantu, ungaze ubaphikele. Siyayazi le nhlobo enjengomyeni wakho, sihlangabezana nayo kakhulu kulolu bizo lwethu. Ave kukhathaza ukuphila impilo ehlukahlukene. Akukho okufihlakele okungeyokuvela. Sifisa sengathi singakhuluma naye simqwashise ngoba isiphetho sesenzo sakhe ngeke sibe sihle. Lo mkhuba wakhe uyovela kabi engalindele futhi kufanele awuyeke. Uma esewuyekile kufanele ungabe usamngabaza njengonkosikazi wakhe. Hlala naye phansi umtshele ukuthi uphatheke kanjani. Lokhu kuyinto esingeke sikukhuthaze ukuba uyibekezelele. Uma engalaleli zama ukuhlala phansi nabaholi bebandla nomfundisi ubabikele lolu daba. Kodwa mazise kuqala ngaphambi kokubatshela. Siyethemba ukuthi isisombululo sizotholakala. Umbuzo: Ngineminyaka ewu-20. Ngihlala ekhaya nomama. Umama wahlukuna nobaba ngisemncane. Manje usethandana nomunye ubaba. Sekuphele iminyaka emithathu bendawonye. Ubaba othandana nomama useqale ukungishintshela muva nje. Indlela akhuluma ngayo nangendlela angibuka ngayo uma umama engekho ayinginiki ukuthula. Uma umama engekho uncoma umzimba wami kodwa akakwenzi lokho uma umama ekhona. Ngelinye ilanga wathi angimphathele amanzi ekamelweni. Kwathi uma ngingena ngamthola enqunu ebhushuzela. Ngagijima ngaphumela ngaphandle kwaze kwabuya umama. Manje ngiyesaba ukumtshela umama ngoba ngiyayazi indlela amthanda namkhonze ngayo lo baba.
Sizakele, eShowe Impendulo: Ukuze ungabi yisisulu sokudlwengulwa, kufanele usheshe ubikele umama wakho konke okwenzekayo.Uma ungenzi lutho ngezenzo zalo muntu kufanele wazi ukuthi uyamkhuthaza ukuthi aqhubeke enze okungaphezulu kwalokhu asekwenzile nokuthi aqhubeke ayokwenza nakwabanye. Sikhuthaza ukuthi uthathe izinyathelo ezinqala ngale kokutshela umama wakho. Lokhu empeleni akuqondene nomama wakho kuqondene nawe nekusasa lakho ngqo. Yithi akakuphinde konke abekusho kuwe ngesikhathi umama wakho engekho. Uma unendlela yokumqopha nangeselula engaboni kwenze lokho. Zama ukuba nobufakazi Sizakele futhi sikhuthaza ukuthi umtshele konke umama wakho, angakumangaza akholwe okushoyo. Ekugcineni uyingane yakhe futhi awumfiseli okubi. Kodwa nawe kufanele ube nendlela ozolubeka ngayo lolu daba. Uma wesaba khuluma nomunye umuntu omdala emndenini noma umngani wakhe umtshele konke.
Uma umama engakukholwa kuyobe kukhombisa ukuthi le mpi kufanele uyilwe wedwa. Ungalivula icala emaphoyiseni ukuze kube wudaba abomthetho abalwaziwayo. Yenza konke okusemandleni akho ukuze ungazitholi usenkingeni yokuba yisisulu sokudlwengulwa.
Ungasibhalela nge-email ku-bookings@moandphindi. com, KuFacebook - Mo & Phindi naku-Instagram - Mo & Phindi