Singalwa nobubha ngokuzijwayeza ukutshala emagcekeni
ISIBALO esishaqisayo sabantu abangu13million kuleli elishona bengazi bazolala bedleni, impela sidinga kuqhanyukwe namasu azosebenza ukusinciphisa.
Izinga lobubha likhulu kakhulu eNingizimu Afrika nohulumeni uyazama ukwelekelela njengoba kukhona abahola imali yezibonelelo kukhona nabakwazi ukuthola amavawusha egilosa.
Lokhu akusho ukuthi uhulumeni kumele adembesele ukudala imisebenzi njengoba kuwukwentuleka kwayo okwenza ububha bube phezulu kangaka.
Akusizi kodwa ukuthembela kuhulumeni kuphela, kukhona nathi esingakwenza ukulwa nobubha.
Yingakho sileseka ikhwelo elihlatshwe yiPhini likaNgqongqoshe wezoLimo, amaHlathi nokuDoba, uMnuz Bheki Cele lokuthi abantu emalokishini nasemadolobheni kumele bazijwayeze ukutshala imifino nezithelo abazokudla.
UCele ngeledlule uvakashele eMlaza eyokhuthaza abantu ukuba basebenzise amagceke abo ukutshala abazokudla.
Akubalulile wukuthi imizi eminingi emagcekeni inotshani obuhle, obuchelelwa mihla namalanga athi esikhundleni sokumosha amanzi kuchelelwa utshani kumele kuchelelwa izingadi ezinezitshalo abazozidla.
Kumba eqolo ukudla ezitolo kulezi zinsuku kepha ukuba nezitshalo ezithize egcekeni kungasiza ekongeni imali njengoba okunye uzobe ungasakuthengi usukuvuna egcekeni.
Siyabagqugquzela abantu emadolobheni ukuba balamukele leli khwelo basebenzise amagceke abo ukutshala, uphume umqondo wokuthi ukutshala nokuvuna yinto yabantu basemakhaya kuphela.
Isimo sibi ezweni, siyalelwa nsukuzonke ukuthi songe imali sigweme nokuyisebenzisela izinto ezingathi shu.
Ukuzitshalela izithelo nemifino kuzokongela imali futhi kuzoba yimpendulo nakulabo okushaya isikhathi sokudla bengazi ukuthi bazothathani bahlanganise nani.