Saphoqwa kangaka ukukhuluma isiNgisi sibe siKwaZulu-Natal?
Mzwakhe Duma NTABAMHLOPHE, ESTCOURT MHLELI: Ngicela ukukubeka kucace ukuthi le ndlela esikhulunyiswa ngayo isiNgisi sekuyingcindezelo engeke siyibekezelele siyisizwe saKwaZulu-Natal. Kwezinye izitolo eThekwini kumele ukhulume isilungu yize uKwaZulu. Ngisho nesinkwa imbala kumele usibize ngesilungu. Kanti senzeni eNingizimu Afrika?
Kwathiwa izilimi ziyalingana eNingizimu Áfrika kodwa kusabonakala kunokuqhubeka ukuthunjwa kwabantu bohlanga kwelakubo. Kanti koze kube nini sithunjiwe yize kuthiwa sesikhululekile eNingizimu Afrika?
Ngicela kuphasiswe umthetho ozothi wonke umuntu ongena KwaZulu afundiswe ukubingelela ngesiZulu aphinde afundiswe izimpahla ezithile ngesiZulu, nokuvalelisa ngolimi olukhulunywa kakhulu kuleso sifundazwe akusona, ukuze axhumane ngendlela enenhlonipho nabantu baleso sifundazwe. Lokho kuzosenza sizigqaje ngezilimi zethu zaseMzansi Afrika.
Sicela imithi yasezibhedlela iyekwe ukubhalwa ngesiBhunu kepha ibhalwe ngesiZulu KwaZulu-Natal. Kade sacindezelwa sesifisa ngisho ukwenza noma yini ukuze siphume ebugqilini bamaBhunu. Sicela uhulumeni akhiphe imibhalo yesibhunu emithini yasezibhedlela zaKwaZulu-Natal afake okutolikwe ngeSiZulu ukuze sizifundele yonke imigomo nemininingwane yaleyo mithi ngaphandle kokuphazamiseka emqondweni.
Sicela futhi uhulumeni asisize asilungisele amagama ezindawo abizeke ngendla eyiyona. Isibonelo Pongola esikhundleni sokuthi uPhongolo. Nezinye izindawo ezashintshwa indlela ezibizwa ngayo ngenxa yobandlululo azilungise ngokubambisana nomasipala namakhosi nabantu bendawo ukuze kube yimpumelelo. CS Madela OLUNDI