Ezamabhizinisi nedili likamasikandi
OSOMABHIZINISI bazohlonyiswa ngolwazi kwiSimunye Mtubatuba Multi-Cultural Exhibition & Festival eseMtubatuba Rugby Stadium kusukela namhlanje.
IMeya kaMasipala waseMtubatuba uQhina Mkhwanazi ithe lo mbuthano uzoqala namhlanje uze uphothulwe ngoMgqibelo ngedili lomcimbi kamaskandi, okuboshelwe kulo uKhuzani, Igcokama Elisha, Mroza Fakude, Mkhathazi, Thokozani Langa, Imithente, Zero Khumalo, Cevuzile, Amaphikankani, Amageza Amahle, Osaziwayo, Qhoshangokwenzakwakhe, Mdumazi, Imfezemnyama, Mahosha, Msolwa, Njoko, Qhabula, Amadwala, Ithwasa lendidane, Mjaheni, Somkhele Brothers, Mtuba Thulisa, Abafana Benkunzi, Amathe Amnandi, Mjay Namalayisi, Amaduyaza Amahle nabanye.
“Sizoqala ngokufukula osomabhizinisi abasacathula ngolwazi ukuze bakwazi ukusimamisa amabhizinisi abo. Sicela bonke abantu abanamabhizinisi nabanesifiso sokuzisungulela amabhizinisi abo ukuba bafike.
Baningi ongoti abazobe bebachushisa ngokuthi ibhizinisi liqalwa kanjani. Nabafuna ukusungula imifelandawonye, bangeza ukuze bacotshelelwe ngolwazi kule ngqungquthela,” kusho uMkhwanazi.
Umculi odumile kule ndawo uStezie Mhlanzi waMabayeni Amahle ubonge kakhulu kumasipala ngokunikezwa ithuba lokuveza ikhono lakhe endaweni akhule kuyo.
“Abantu bangakithi bazothola ithuba lokuzwa nezingoma zami ezikwi-albhamu yami entsha ethi Imvalamlomo. Kuyo ngibophele amanoni ezingoma ezithakwe nangesigqi se-rock.
Okuhle ngayo ngiyikhiphe ngaphansi kwenkampani yami iThandamanzi Music ngokubambisana neMantshinga and Family Music ngenhloso yokuqhakambisa igama likaStezie Mhlanzi,” kusho uStezie.