Imvelaphi yemibala komaskandi
HAMBILINI bekulukhuni ukuhlukanisa abalandeli bomculi othile kamaskandi ngenxa yokuthi ayikho into abebegqame ngayo, ngaphandle kokuthi basho bona ukuthi balandela muphi. Kwesinye isikhathi bebeze babhale ezikibheni abazigqokile igama lomculi abamlandelayo.
Muva nje sebehlukaniseka kalula ngenxa yemibala abayisebenzisayo. Banezizathu ngemibala abayisebenzisayo. Kumuntu owuqondayo umaskandi uyazi ukuthi abalandeli baMageza Amahle Amahle bagqoka umbala o-lime nomnyama, AbeGcokama Elisha bagqoka umbala obomvu nomhlophe, abakaKhuzani bagqoka oluhlaza okwesibhakabhaka kuthi oSaziwayo bagqoke omnyama nomhlophe.
Induna yaMageza Amahle, uVeloh Bhengu ithe umbala o-lime wakhethwa yiNdidane ngenhloso yokuthi bahluke kwabanye abalandeli bayo.
“Umbala o-lime yayiwuthanda kakhulu. Ithe uma isifuna ukuthi sibe nento ezosenza sihluke kwabanye abalandeli, yathi kumele sisebenzise wona. Phambilini besigqoka izikibha ezinemibala enhlobonhlobo kodwa ebeziba nesithombe sayo.
Yathi ngenxa yokuthi sebebaningi abaculi bakamaskandi abanabalandeli kumele abalandeli bayo bagqoke umbala o-lime.
Omnyama esiwuxuba nezikibha ezi-lime wakhethwa yithina abalandeli.
“Ngesikhathi iphakamisa lo mbala sacela wukuthi kube iyona eyakha lezi zikibha sizithenge kuyona ukuze yenze imali ngazo. Okunye esasikucelile kwaba ukuthi yenze isiqiniseko sokuthi uma kune-albhamu yayo ephumile ifake isithombe sayo kuzona. Ngokuhamba kwesikhathi kube sekuqala kwenziwa namajakhethi namakepisi ayilo mbala,” kusho uVeloh.
Uthe ngemuva kokushona kwayo, ibhizinisi lokudayisa izimpahla ezinalo mbala liqhutshwe ngomunye wabalandeli bakamaskandi uMhlonipheni Mazibuko, osekuthengwa kuyena izimpahla ezinalo mbala. Uthe sekuba kubona abalandeli ukuthi bafuna nhloboni yezimpahla zokugqoka kodwa besebenzisa lo mbala.
Induna yabalandeli
PbeGcokama Elisha, uSboniso Cele ithe bebesebenzisa umbala obomvu okhonzwe yilo mculi.
“Besifuna ukubonakala ngawo ukuthi singabalandeli bakhe ngoba besibona ukuthi uyawuthanda. Ngokuhamba kwesikhathi siqaphelile ukuthi uMthandeni (Igcokama Elisha) lingumuntu othanda inhlanzeko sase sinquma ukuthi asifake nombala omhlophe. Ngenhlanhla nasezingomeni zakhe ucula ngothando. Umbala obomvu nomhlophe uyahambisana nothando njengoba nangosuku lwezithandani kuyiyona mbala esetshenziswayo.
Zibe ziningi izinto ezisenze sabona ukuthi yonke into yakhe ihambisana nothando njengoba negama lakhe kunguMthandeni,” kusho uSboniso.
Lezi zimpahla uthe ukhona obenzela zona eThekwini nababili abaseGoli. Uthe kuba yizikibha, amathawula namakepisi.
KwabakaKhuzani Mpungose iNdlamlenze, bathe akukho sizathu esitheni esibenze bakhetha umbala oluhlaza okwesibhakabhaka ngaphandle kokuthi yiwona abawubone umuhle futhi bengekho abalandeli bakamaskandi abawusebenzisayo.
“Umehluko ngalo mbala esiwusebenzisayo ukuthi kuba nophawu lwesiginci esiyisebenzisayo kule mpahla.
Ukuthatha isinqumo sokusebenzisa wona kube ngonyaka odlule ngesikhathi sibona ukuthi sebebaningi abalandeli bakaKhuzani.
“Uma siwusebenzisa siwuxuba nombala omnyama kwesinye isikhathi kodwa into egqamile kuba oluhlaza. Kuba yizikibha, amajakhethi namatracksuit,” kusho uMvumeleni Zwane oyinduna yabalandeli beNdlamlenze.
Enye yezinduna zabalandeli boSaziwayo abaholwa uKhangelani “DSD” Mhlongo, uZinhle Radebe: “Umbala omnyama sasiqonde ngawo ukubheka emuva lapho kusuka khona uKhangelani.
Lo mbala umele ubunzima ake wabhekana nabo ngesikhathi kusanda kushona uMgqumeni. Thina njengabalandeli bakhe sasifuna ukulandela iqembu Amagcokama elaliholwa uMgqumeni uma lizoholwa uyena uKhangelani. Inkinga ukuthi kwasuka umbango sekuqhamuka Abafana bakaMgqumeni befuna ukuhola iqembu kanti sasingabajwayele bona kulona. Umbala omhlophe umele ukukhanya manje njengoba uKhangelani esaziwa futhi ethatha nezindondo,” kusho uZinhle.
Uthe kulo mfaniswano wabo kuba yizikibha ezimhlophe namabhulukwe amnyama noma amashethi amhlophe abhalwe ukuthi Osaziwayo. Uthe isithombe esinehhashi asisali, simele isithakazelo sikaKhangelani onguNjomane.
Lezi zimpahla uthe bazenzelwa uSkhweleseshende Khumalo noTwobullets Zungu abangabalandeli boSaziwayo. Uthe abanye abalandeli babo abakude kuZungu noKhumalo bavumelekile ukuthi bazakhele izimpahla.
Induna yabalandeli bakaMjikijelwa Ngubane Ichalaha likaShafuza, uSoh Mkhonza ithe umbala o-powder blue abawusebenzisayo umele amadlelo aluhlaza.
“Ukuba ngumlandeli kaMjikijelwa kufana nokuba semadlelweni aluhlaza. Lokhu sikusho ngoba uMjikijelwa akasukeli muntu kodwa uzishayela ingoma nje kuphela. Kwesinye isikhathi sike siyisebenzise neminye imibala njengomhlophe nomnyama. Kulokho sisuke silandela indlela ayiyona. Kafushane nje komnyama nomhlophe sisuke silandela izibongo zakhe uma ethi uyinunu emnyama, emhlophe ngemisebenzi yayo,” kusho uSoh.
Bakhona nabanye abalandeli asebelandela kulesi sitayela sokugqoka njengabakaQhosha abagqoka izikibha ezi-purple.