‘Bese luphela uthando lwesibhakela’
UBEKADE esephelelwa wuthando lwesibhakela umshayisibhakela waKwaZulu-Natal, uMfundisi Ngema, ofulathele lesi sifundazwe ngenxa yenkemane yezimpi ehlasele amabhokisa.
UNgema (5-1-0) waseSikhaleni, eMpangeni, ujoyine ijimu yezelami zakwaSmith, uPeter no-Shaun, iSmith’s Gym, eGauteng, ngoJulayi. Ngempelasonto ulwe impi yakhe ekulesi sitebele.
Ukhale ngaphansi ngamaphuzu kuRonald Malindi empini ebingajabulisi ngenxa yokuthi bobabili abashayisibhakela bebechitha isikhathi esiningi bebambana. Le mpi ibikade ibhulela amazolo eyosuku ebiphakathi kukaMoruti “Babyface” Mthalane no-Isaac Quaye waseGhana, eRamosa Community Hall, Mohlakeng, eGauteng. Izimpi bekuhloswe ngazo ukuhlonipha owayengumpetha womhlaba uPeter “Terror” Mathebula. ESmith’s Gym, uNgema unoThabiso “The Rock” Mchunu waseCato Ridge ongumpetha we-SA cruiserweight ne-African Boxing Union (ABU) naye owafudukela eGauteng eyozama amadlelo aluhlaza.
UNgema ungomunye wabashayisibhakela obekubhekwe lukhulu kubona ngesikhathi beshiya esigabeni sama-amesha. Ngaphandle kwalokho uzojima endaweni eyodwa noThulani “Tulz” Mbenge ongumpetha we-SA welterweight no-Ayabulela Sonjica ayenabo esigabeni sama-amesha.
“Isibhakela kade sesiphuma kimina, kade ngingasasithandi. Ngibone kungcono ngithathe elinye igxathu eliya phambili. Izimpi bezingekho, umuntu engalwi. Abantu engiqale nabo esigabeni esikhokhelayo sebephethe amabhande,” kusho uNgema.
Abashayisibhakela abasuka ezindaweni ezehlukene kuleli bathutheleka eGauteng ngenxa yokwentula izimpi ezifundazweni zabo. Kodwa akubona bonke abafike baphumelele. Obengumpetha we-International Boxing Organisation (IBO) lightweight, uXolisani “Nomeva” Ndongeni waseMthatha, ugcine exabene nabaphathi bakhe iGolden Gloves Promotions, walaxaza umqeqeshi uColin Nathan ngenxa yokungagcinwa kwezethembiso ngezimpi.
USanele Msimango, waseNtshanga, ugcine elibangise eBhayi ngenxa yendlala yezimpi eKZN. “Engikudinga kakhulu koSmith wukuthola izimpi ezizonginika imali ngoba kuningi okungibhekile empilweni. Ngaphandle kwalokho ngiyazi ukuthi ngizothuthuka ngesibhakela ngifinyelele ezingeni eliphezulu. Lapha nginabashayisibhakela abanamava abazongisiza kakhulu ukuthuthukisa ulwazi lwami. Angisho ukuthi lapho engisuka khona bebekade besezingeni eliphansi kodwa lapha ngiyabona ukuthi ngizozuza kakhulu,” kusho uNgema.