Utusa iqembu lakhe ngolukaBrockie
ISILOMO seSuperSport United okuyisona esifake iSuperSport United kowandulela owamanqamu weCAF Confederation Cup, uThuso Phala, situsa iqembu ngokungagobi ngesikhathi amaqembu athathwa njengeziqumama ezama ukubahlwitha uJeremy Brockie.
UPhala ushayele iSuperSport amagoli amabili eZambia lapho ibambane khona ngo 2-2 neZesco United kowomlenze wesibili we-quarter final. Kowomlenze wokuqala iSuperSport ibibambane neZesco ngo 0-0 ekhaya. Kowandulela owamanqamu iSuperSport izobhekana neClub Africain yaseTunisia ngenyanga ezayo. Ozowina lapho uzobhekana neTP Mazembe noma i-FUS Rabat kowamanqamu - nawo uzoba yimilenze emibili.
NgokukaPhala, ukuhlala komgadli obefunwa yiMamelodi Sundowns, uBrockie waseNew Zealand, kuzobenza babe yinkinga kwiConfederation Cup futhi njengoba benomdlalo wamanqamu weMTN 8 neCape Town City ngenyanga ezayo eThekwini, bazoya kuwona ngokukhulu ukuzethemba.
“Maningi amathuba okuhamba ibanga size siliqede kwiConfederation Cup uma sinomgadli ofana noBrockie. Ngikushayela kakhulu ihlombe ukugoloza kweSuperSport noBrockie njengoba kade egaqelwe amaqembu amaningi kwiPremiership. Ukube uhambile besizophazamiseka ngandlela thize ngoba akagcini enkundleni ukuba mqoka kithina kepha nangaphandle kwayo uwusizo. Uma eshaye igoli kujabula wonke umuntu. Okuhle ukuthi vele useyikhohliwe indaba yokuthi ucishe wahamba.
“Ngenxa yokuthi iqembu limgcinile angingabazi ukuthi sizothi sifika kowamanqamu weConfederation Cup sibe sesiyifakile indebe yeMTN 8 ekhabetheni. Kulezi zinyanga ezimbili izinhlelo zithi kumele sibe semidlalweni yamanqamu emibili,” kusho uPhala.
UBrockie useshaye amagoli ayisishiyagalolunye emidlalweni yeConfederation Cup okumbeka kwelihle ithuba lokwemuka nomklomelo womdlali oshaye amagoli amaningi emqhudelwaneni uma ususongwa.
Ngokushaya amagoli amabili uPhala uthe ujabule kodwa uyazi ukuthi lokhu izithelo zokuzikhandla kweqembu. Ngijabulela ukuthi bengisendaweni efanele ngesikhathi esifanele. Konke lokhu okwenzekayo amaqhinga ka-Eric (Tinkler) osihola ngobuhlakani. Amangwevu akhe kulo mqhudelwano awolukhulu usizo kithina. Akimina oweze iSuperSport kodwa sisebenze sonke ngendlela efanayo,” kusho uPhala.
ISuperSport bekumele idlale naMaZulu kowe-Absa Premiership eLucas Moripe wahlehliswa. njalo