‘Sizovuka ngayo iRichards Bay’
INJINI yeRoyal Eagles, uMphakamiseni Nene, ikholwa wukuthi sesidlulile isikhathi sokunikela ngamaphuzu eqenjini elitabalasa emsileni we-log kwiNational First Division (NFD).
I-Eagles, ehluleke ekugcineni ukuzibekisela indawo kuma-Play Off ngesizini edlule, ayikaze iwine nowokubika umdlalo selokhu kuqale eka2017/2018. Isemsileni ngamaphuzu amathathu emidlalweni eyisihlanu.
Isanda kuhlukana nomqeqeshi u-Allan Freese owenyusela kwi-Absa Premiership iHighlands Park ephinde yadliwa yizembe ngesizini edlule. Izobhekana neRichards Bay FC emdlalweni wabakhaya eRichards Bay Sports Complex ngoMgqibelo ngo-3 ntambama.
UNene, obegijima kwiThanda Royal Zulu ewine iligi yeNFD ngesizini edlule, ukholwa wukuthi sekufike isikhathi sokuqoqa amaphuzu. KwiRich Boys (Richards Bay) kunabadlali abekade enabo kwiThanda ngesizini edlule nomqeqeshi uRoger Sikhakhane, kanti uyena (uNene) ungqondongqondo othenjiwe.
“Ngikholwa wukuthi yibhadi nje elisihlasele ngoba sidlala kahle. Amagoli asingenelayo ayimbangela yamaphutha ethu. Phambili siyahluleka ukushaya amagoli phezu kwamathuba esiwatholayo,” kusho uNene.
“Sizovuka ngayo iRichards Bay, ngeke sikuvumele ukuqhubeka nokulahla amaphuzu ngoba imidlalo iyahamba. Uma siyekela imidlalo ifike kweyisikhombisa singakasuki lapho esikhona, kuzoba nzima.” Phezu kokuba izimpunyela zakwaMpisane eziphethe i-Eagles zizimisele ukubona iqembu ligijima kwiPremiership kodwa kubukeka kuzofanele zilinde enye isizini. Ekupheleni kwesizini ka-2016/2017, kusabalale amahlebezi okuthi zifuna ukuthenga iPlatinum Stars ekwiPremiership. “Abaphathi bayasinakekela ngakho konke. Uma isimo siqhubeka kanjena bazoqala ukukhathazeka. Sidinga amaphuzu amathathu. Singabadlali siyikhulumile le ndaba ukuthi asizimisele ngokweqile ukuze iqembu lisuke lapho likhona,” kusho uNene. Imidlalo yeNFD: Kusasa: Cape Town All Stars v Black Leopards (Athlone Stadium, 3pm) NgoMgqibelo ngo-3 ntambama: Pretoria University FC v Mbombela United (ABSA Tuks Stadium); Super Eagles v Real Kings (Goble Park); Mthatha Bucks v Stellenbosch (Mthatha Stadium, 3pm); Highlands Park v Ubuntu Cape Town (Makhulong Stadium, 3pm); Richards Bay v Royal Eagles (Umhlathuze Sports Complex) NgeSonto ngo-3 ntambama: Tshakhuma Tsha Madzivhandila v Witbank Spurs (Thohoyandou Stadium); Jomo Cosmos v Uthongathi FC (Vosloorus Stadium)