‘Abadlali abancane badinga iziyalo’
UMQEQESHI weKaizer Chiefs, uSteve “Mphathi” Komphela, uwukhombe kubona njengabaqeqeshi umsebenzi wokunakekela abadlali abasebancane ukuze lingashabalali ikusasa labo.
UKomphela, obekunesikhathi eside kukhalwa ngokuthi akabadlalisi abadlali abasebancane kwiChiefs, ushintshe unyawo emasontweni edlule ephonsa enkundleni uWiseman Meyiwa obedlala enkulisa yaMakhosi noKhotso Malope obebolekiswe kwiThanda Royal Zulu ebidlala kwiNational First Division (NFD) ngesizini edlule.
ENingizimu Afrika baningi abadlali abasebancane abagcine beshabalele, bengafinyelelanga esicongweni ngenxa yokuhaqwa yizinkinga ezihambisana nemali nodumo. Kulaba badlali kukhona uJunior Khanye noThabiso “Skappie” Malatsi ababeyibamba kwiChiefs, noSipho Nunens okwakubhekwe lukhulu kuyena kwiMamelodi Sundowns.
Bonke bavuma ukuthi okushabalalise ikusasa labo ukungazitholi iziyalo eziphusile nokuhluleka ukumelana nodumo nemali ehambisana nokudlala ibhola kwi-Absa Premiership.
UKomphela, oseqale isizini yesithathu epheka iChiefs, akakaze awine neyokubika indebe nosekumakhele isigcwagcwa kuMakhosi. Uthe abadlali abasebancane badinga abaqeqeshi eduze kwabo ukuze bangaphumi endleleni.
“Abadlali abancane badinga iziyalo. Sibatshela ezindlebeni ukuthi kudingeka bazibeke phansi ngoba uzoyizwa ngendaba impumelelo uma uziphakamisa. Kukhona ongumgadli wePirates uFoster ( Lyle) ongena adlale kahle. Kuhle ukubona lokho. Kukhona uMeyiwa noMalope kithina abasadinga ukuthola ithuba. Kuwumsebenzi wethu njengabaqeqeshi ukubadonsa ngendlebe,” kusho uKomphela.
“Kodwa okubaluleke kakhulu yinina abezindaba ukufaka isandla kulokhu ngezinto ezingabacekela phansi lezi zingane. Angisho ukuthi nibatotose kodwa asivikeleni okungokwethu ngoba akubona abeChiefs kuphela kodwa ngabeNingizimu Afrika yonke futhi bangabebhola ngobubanzi. Sonke esithintekayo kule ndima, asiyivikele ngokusiza laba badlali.”
Ezinyangeni ezedlule owengamele inkulisa yeSuperSport United, uKwanele Kopo, osanda kukhiqizela iqembu elikhulu uTebogo Mokoena osekukhulunywa ngaye, uthe konke kusezandleni zabadlali ukuziphatha nokuthi yini ayihloniphayo. Wathi izinhlaka ezehlukene zokusiza abadlali zibalulekile ukuze abadlali bengaweli eweni njengabanye.
UKomphela kulindeleke ukuthi aphinde aphonse uMeyiwa noMalope uma iChiefs isigadulisana neBaroka emdlalweni wePremiership eMoses Mabhida Stadium, eThekwini, ngoMgqibelo ngo-6 ntambama. Amakhosi asendaweni yesine ku-log ngamaphuzu ayisishiyagalolunye emuva kwemidlalo eyisithupha. Ngempelasonto edlule abambane neLamontville Golden Arrows ngo 0-0 eFNB Stadium.
NgeSonto: Platinum Stars v Mamelodi Sundowns (Royal Bafokeng Stadium, 3pm); Bloemfontein Celtic v Bidvest Wits (Dr Molemela Stadium, 3pm)