Icala kwabanyusa eyemifino nezithelo
KUSHILE kwabakokotela intengo yemifino nezithelo ezimakethe zaseNingizimu Afrika emuva kokuthi inhlangano ebhekele ukuncintisana okuhle, iCompetition Commission, ibathole benecala lokunyusa intengo ngokwedlulele.
Zingu-14 izinkampani okutholakale ukuthi zikokotela intengo yemifino nezithelo ePitoli, eGoli, eThekwini naseKapa. UMnuz Sipho Ngwema obhekele ezokuxhumana kwiCompetition Commission utshele Isolezwe ukuthi abalimi bathole izinkampani ezingu-14 zinecala lokukokotela intengo yemifino nezithelo base bedlulisela icala esigungwini esizokhipha usuku lokushushiswa kwazo.
“Uphenyo siluqale ngoMashi sathola ukuthi abalimi bahambisa imikhiqizo yabo kulezi zinkampani bese zibatshela ukuthi zizobadayisela ngentengo ethile. Sithole ukuthi amazambane no-anyanisi kubiziswa phakathi kuka-5% no-6%. Okusho ukuthi umlimi akanazwi lokuthi umkhiqizo wakhe ubiza malini kodwa uyatshelwa. Abathengi babanjwa inkunzi ngoba imifino igcina imba eqolo,” kusho uNgwema.
Uthe izithelo bezibizwa u-7.5% neminye imifino, okulethwe kungafakwanga emakesini noma emabhokisini kubize u-9.5%.
“ICompetition Commission ilwela abampofu ngoba uma sekukokotelwa intengo yokudla kusho ukuthi bazokhokha kakhulu. Sithole ukuthi ukukokotelwa kwentengo yokudla kwaqala eminyakeni engu-50 edlule kwazise kuhlala phansi ama-agents nabanikazi bezimakethe banqume ukuthi bakhokhelwa malini abalimi nokuthi umphakathi uzodayiselwa ngamalini,” kusho uNgwema.
Izimakethe ezizoshushiswa yilezi: Botha Roodt (eGoli), Botha Roodt (ePitoli), Suptropico (Pty) Ltd; Interaction Market Services; Holding (Pty) Ltd; Dapper Market Agents (Pty) Ltd; Dw Fresh Produce CC; Farmers Trust CC; Noordvaal Market Agents (Pty) Ltd; Marco Fresh Produce Agency; Wenpro Market Agents CC; Wenpro Market Agents (eziKwaZulu-Natal); Prinsloo & Venter Market Agents; Fine Bros (Pty) Ltd neDelta Market Agents (Pty) Ltd. UNgwema uthe udaba balusukumele emva kwesikhalo soMnyango wezoLimo, amaHlathi nokuDoba ngezinkampani ezixhumanisa abadobi nabathenga ufishi.