U-Odwa akayicabangi eyokuqeqesha
AKAYICABANGI eyokuqeqesha umbhoxo u-Odwa Ndungane weCell C Sharks okuzothi ngemuva kweCurrie Cup awagaxe emgibeni amakhokho akhe. UNdungane, ofike kwiSharks ngo-2005 esuka ePitoli, utshele Isolezwe ukuthi yize engeke aqhele kulo mdlalo omakhele udumo yena newele lakhe u-Akona kodwa eyokuqeqesha akayiphuphi.
Kusukela efikile eThekwini, uqale waba umdlali omqoka wagcina esefana nobhuti omdala kubafana ababefikela ezandleni zakhe. Lokhu kumakhele olukhulu ugazi kubalandeli, abaphathi nakubadlali.
Ukuzinikela kwakhe emsebenzini nokuhlale njalo emamatheka kumenze wagcina esengumdlali omqoka ezindlini zokushintshela zeSharks. Umdlalo weSharks neWestern Province ngaphambi kokungena kuvuthondaba lweCurrie Cup kuzoba yiwona azovaleliswa ngawo.
ISharks imemezele ukuthi lo mdlalo iwona azobongwa ngawo uNdungane ngakho konke akwenzele iSharks kule minyaka ayihlalile.
Ekhuluma naleli phephandaba uNdungane uthe, akazi ukuthi yini okufanele ayilindele ngemuva kokuwabeka ethala amakhokho kodwa eyokuqeqesha akayicabangi. Akazange asiveze isizathu salokhu kodwa ubekucacisa ukuthi akaziboni ewumqeqeshi.
“Akufanele ufunge emhlabeni kodwa okwamanje ngithi ngeke, angisoze ngaqeqesha. Ziningi izindlela zokubuyisela kumbhoxo kodwa hhayi ukuqeqesha. Sengikuhlehlise kaningi ukuthi khumu kwami kodwa kulokhu kuzwakala sengathi isikhathi sokuvalelisa sesifikile. Akubanga isinqumo esilula kodwa ukuxoxa nomndeni ikakhulukazi umfowethu (naye osanda kuthi khumu) kungisize kakhulu. Engingakusho nje ukuthi njengoba isikhathi silokhu sihamba ngiya ngokuya ngiyasaba ngoba okuzokwenzeka uma sengibeke phansi konke angazi kuzongiphatha kanjani.”
UNdungane uthe ukuvala isikhala sokuqeqesha, yena nomfowabo bazovula inkampani ezogxila ekukhulisweni kwabadlali bombhoxo abasebancane ngoba bona abazange bakuthole lokho.
“Sizohlala eThekwini mina nomndeni wami ngoba unkosikazi unebhizinisi elivuthayo lapha kanti nabantwana basezikoleni ezikahle khona kwelikaBhanana.”
Lesi silomo esizalelwe eMthatha eminyakeni engu-36 edlule sithe siyokukhohlwa sifile esikwenzelwe yiSharks kule minyaka engaphezulu kweyishumi esiyihlale kuyona. “Kusekhaya lapha futhi konke engiyikho kungenxa yeSharks. Angifuni ukucabanga ukuthi ngiyobe ngizwani enhliziyweni ngomdlalo wokugcina. Sekungabalula nokho uma singayinqoba iCurrie Cup okuyobe kungokwesine kimina.” ISharks izodlalela umdlalo owandulela owamanqamu ekhaya. Okunye ngoNdungane:
Uhlale iminyaka engu-12 kwiSharks.
Uqale umbhoxo kwiBlue Bulls.
Usohlwini lwabakhethekile asebedlale ka-100 nangaphezulu kwiSuper Rugby.
Uzobe egqoke unombolo-249 ngoMgqibelo.
Usewadlalele kasishiyagalolunye amaBhokobhoko.