Kusenjalo ngowamanqamu weMTN 8
NGEKE uphazamiseke umdlalo wamanqamu weMTN 8 phakathi kweSuperSport United neCape Town City, eMoses Mabhida Stadium, eThekwini ngoMgqibelo ngo-7 ebusuku.
Imvula enamandla ihlasele iTheku ngoLwesibili emini. Ishiye omkhulu umonakalo yadlula nemiphefumulo yabantu. Lokhu kushiye abathandi bakanobhutshuzwayo bezibuza mayelana nokuthi umdlalo wamanqamu weMTN 8 uzoqhubeka yini eThekwini. UVusi Mazibuko oyimenenja yaseMabhida utshele Isolezwe ukuthi awukho umonakalo omkhulu owenzeke enkundleni.
“Kukhona izindawo ezithintekile ngemuva kwale mvula enamandla. Phakathi kwazo singabala okudayiselwa kuzo. Ezinye izitolo kuphoqeleke ukuthi zivalwe enkundleni ngoba amanzi angene ngaphakathi. Zizovulwa kusasa (namuhla). Inkundla ibe nedamu lamanzi kodwa uhlelo lwethu lokuwamoma lwenze kwaba lula ukuthi asheshe acwengeke.
“Ithimba elilungisa inkundla lizoxhumana nePremier Soccer League namuhla ntambama. Umdlalo uzoqhubeka njengoba ubuhleliwe. Umkhankaso wokunxusa abantu ukuthi baphume ngobuningi ngoMgqibelo obuhlelwe ukuthi ube seMega City, eMlazi, sigcine siwuhlehlisile kodwa usazokuba khona,” kusho uMazibuko.
Umcimbi wePSL wokuklomelisa umdlali nomqeqeshi ovelele ngoAgasti nangoSepthemba ugcine ubhutshile ngenxa yemvula enamandla. UJulius Mahlangu wezokuxhumana kwaSouth Africa Weather Service, eThekwini, uqinisekisile ukuthi ayikho imvula enamandla ebikiwe ngoMgqibelo.
“Aykho imvula enamandla engalindeleka ngoMgqibelo. Phakathi nosuku izulu lizobe lipholile bese kuthi ntambama liguqubale. Ebusuku imvula kulindeleke ukuthi ibe ngu-30%. Ngakho angiboni ukuthi umdlalo usungaphazamiseka,” kusho uMahlangu.
ULuxolo September wezokuxhumana kwiPSL uqinisekisile ukuthi umdlalo uzoqhubeka njengoba ubuhleliwe.
“Asikhathazekile nancane. Isikhathi sokulungiselela umdlalo sisavuma. NaseGoli imvula enamandla beyihlasele ngoLwesibili kodwa ngoLwesithathu izulu laphenya. NgoMgqibelo ayikho imvula enamandla esabikiwe okwamanje. Umdlalo uyaqhubeka futhi siyacela ukuthi abalandeli bathenge amathikithi. Abalandeli baseThekwini abakaze baphoxe futhi nakulokhu angingabazi ukuthi ngeke baphoxe,” kusho uSeptember.
UMazibuko uveze ukuthi asecela ku-10 000 amathikithi asedayisiwe kanti babheke ukuthi bahehe abalandeli abangu-25 000 ngoMgqibelo.