Uyibheke ngabomvu impi nowaseDRC
UMSHAYISIBHAKELA wasoLundi, uXolani Mvubu, ubona ikhanya indlela ebheke ekuphatheni isicoco ngaphansi komqeqeshi omusha uSechaba Mabuya osekhiqize ompetha abaziwayo esibhakeleni saseNingizimu Afrika.
UMvubu ulwe okokuqala ngaphansi kukaMabuya empini aphonse kuyona ithawula ekade ebukeka ehamba phambili ngamaphuzu ebhekene noFrance Ramabolu. Kade bebanga ibhande leWorld Boxing Federation International Super-Middleweight eDr Molemela Sports Complex, Bloemfontein, eFree State ngoLwesihlanu olwedlule.
Lo mshayisibhakela ubekade esemvuse phansi uRamabolu kodwa akangabe esasukuma ekhoneni lakhe ukuzoqala umzuliswano wesikhombisa. Uhlukane nomqeqeshi wakhe weminyaka uThemba Zulu ngenxa yempilo yakhe (uZulu) ebuthaka.
UMabuya ubekade epheka umpetha weSA JuniorMiddleweight, uNkululeko “Bulldog” Mhlongo waseShowe.
“Sizwana kakhulu noSechaba. Ngiyazibona ngingumpetha ngaphansi kwakhe. Konke esikwenzayo ejimini, sikwenza njengompetha. Akasebenzi nabantu abangazazi ukuthi baya kuphi,” kusho uMvubu.
“USechaba ungikhumbuza uThulani Magudulela esengumqeqeshi. Ukuba akayekanga ukulolonga ngabe kade ngaba umpetha. USechaba uyindoda ezinikele, ethanda ezemidlalo. Akahambisi phambili imali. Ngisuke kuZulu ngenxa yesimo sempilo yakhe. Isikhathi abekade esesichitha ejimini besikade sesisincane ngenxa yokubanjwa wukugula.”
UMvubu (11-11-2), waqala isibhakela ngo-2007 kodwa ubeqala ngempelasonto edlule ukulwela ibhande. Kubashayisibhakela abanohlonze asebuya kubona kukhona uWelcome Ntshingila owayengumpetha weWBA Pan African Welterweight , uBarend van Rooyen ohlulwe nguChristopher Buthelezi empini yebhande leSA Middleweight nyakenye noLee Dyer ophethe ibhande leSA Super-Middleweight. UMvubu uzobhekana no-Augustin Matata waseDemocratic Republic of Congo empini ezoba ngoOkthoba 28 eGauteng.
“UFrance ngimnike mina ibhande, naye uyazi. Empeleni ngimbambisile lona. Kufanele ngiwine ku-Augustin bese ngibuyela ngiyolwa naye. Yilena impi obekuvele kufanele ngiyilwe kodwa ngagcina ngithathe ekaFrance isikhathi sesisincane,” kusho uMvubu.
“Ngiyaxolisa kubalandeli bami ngendlela okwenzeka ngayo ngesonto eledlule. Bayangifonela manje angazi ngizochaza kanjani. Kunzima ukuchazela umuntu ngamunye ngokwenzeka. Ngikhathalile ngoba bengivele ngingayilungele impi ngokugcwele ekubeni ngibona yena ukuthi useza ngamandla.”